呢兩年政府賣地大豐收，地政總署可謂功不可沒。每次賣地，華華都會諗起老朋友、02年退休嘅鬼佬地政署長布培（RobertDouglasPope，圖）。不過，家陣已經變成憶故友，布培今年年頭喺老家英國過身，長眠塞浦路斯。
華華好欣賞呢位地政署前大掌櫃嘅辦事能力同作風。話說由於佢姓Pope，所以有個花名叫「教皇」，呢個花名連布培佢自己都知。不過呢位「教皇」唔單止無家啲官員嗰種官腔，更加冇曾特首同官員親疏有別嘅嘴臉。華華記得，布培經常同傳媒打成一片，所以大家都好敬重佢。由佢主政嗰十幾年，可以話係地政署最開放、最親民嘅年代。
1970年「教皇」23歲時，老遠由英國受聘嚟香港打工，由政府產業測量師做起，百分百紅褲仔出身，一共喺港府服務咗32年。華華祝呢位老友一路好走。