陳浥萍（Monica）的「古董齡」才不過12年，當中經歷過一定要據為己有的霸道期，姬蒂摩絲（KateMoss）訂了的喱士衣衫最後都落在她手上。現在則悠然自得多了，注重分享，開古董衣店與好友合力端一桌燭台銀器茶具hightea也是賞心樂事。撰文：嚴祖莉
陳浥萍愛古董、買古董、儲古董物品至今12年，開始時的理由很pure很純淨，原因是白色！Monica說：「喺台灣長大冇乜古董文化，第一次接觸係喺英國見到，我對打扮冇乜特別研究，淨係比較鍾意白色，到生咗個女後，想幫個女搵白色BB衫，逛吓古董店見到啲衫、飾物，就真正一發不可收拾咁迷上，乜嘢風格好似維多利亞、愛德華，乜嘢年代好似20年代、50年代、70年代我都好鍾意。」
搜古着重拾自我
「一件件古董物品吸引到我係每件都係咁獨特，背後有好多故事，以前啲人做一件事可以好專注，跟住又會一代傳一代，好有意思。或者同成長背景有小小關係，11歲爸爸過咗身，屋企人好重男輕女，16歲出外打工，18歲正式獨立生活，21歲嚟咗香港，好似好少嘢係自己可以控制，忽然見到古董衣衫物品，真係一見鍾情，見到呢啲嘢就自然開心，我覺得搵番自己，着衫扮靚對我嚟講最緊要舒服，唔係鬥快，反而古着就永遠都係咁有強烈特色，同埋精緻嘅做工。」
最瘋狂熱愛的階段，Monica承認有點為求所好，會不擇手段，溫婉的她會突如其來的堅持執着及牙尖嘴利，她說：「走勻紐約、倫敦、巴黎嘅fleamarket，古着店好似倫敦嘅Virgina，巴黎嘅DidierLudot，上網搵，嗰段時間係有啲霸道，心態係千金要買心頭好。」
硬搶姬蒂心頭好
Monica續說：「好似我30歲生日嗰年，決定要買份禮物畀自己，嗰次去倫敦，一到埗就去好出名嘅古着店Virgina，店裏面三分之二嘅嘢幾乎俾我買晒！嗰次店裏面仲有兩件貨：一條係古董喱士裙，另一件係短身古董喱士suit，老闆娘Virgina話呢件係KateMoss訂咗，不過未嚟攞啫，我就同佢講：『我同你買咁多，冇理由唔賣埋畀我？』結果成功買埋，成個旅程心願已經達成，第二日就乖乖去觀光囉。」
瘋狂經驗又豈止一次，Monica說：「另外8年前喺巴黎fleamarket見到一把20年代嘅Tiffany象牙扇，對方開價3,000歐元，堅持收現金，我同店主拉鋸咗好耐，其間就諗假如我放棄，下次返嚟未必仲喺度，雖然幾肉赤，最尾都係：去啦，買咗！」
Monica情迷古着，也愛東方風味的台灣品牌夏姿，最近平日也有穿日牌45rpm，但是有朋友不表認同，她說：「佢哋會問點解你成日着白色，着闊身裙？又點解要用咁多錢買執喱士布嚟鋪枱？但係鍾意係冇得解釋，慢慢朋友會明白，甚至有薰陶咗佢哋都會欣賞古董，自己嘅心態亦有改變，以前幾霸道，家覺得分享都係一樣喜悅。」
營造氛圍享古物
穿古着一度是風尚，但稱不上大眾化，有沒有感覺寂寞？Monica說：「從來冇，當然一身古着最完美係氛圍場景配合，香港人逼樓逼，我會花心思令自己好好享受，好似報紙介紹香港嘅古蹟地方，我會去感受吓，好似虎豹別墅，去吓摩囉街、山頂散步，去當舖、教堂等等，呢啲古老地方真係別有靈氣，又例如會同一班志同道合嘅朋友耐不耐舉行一啲有心思嘅活動交流分享，好似同LouiseKoo（顧復珍）搞沙灘hightea，有人拎枱布，有人拎銀器餐具茶具，有人拎燭台，合力炮製一個啱嘅氛圍出嚟。」
Monica又說古董對她靈氣迫人，例如：「有時諗吓想擁有一樣點樣嘅古董，諗吓諗吓，就會俾我撞到，真係要感恩。」已經擁有數之不盡的古董衣衫鞋履飾物擺設，未來的心頭好是甚麼？她說：「我會開始發掘大件啲嘅傢俬，夢想係希望可以舉行展覽甚至開間博物館。」攝影：陳俊強
化妝、髮型：淑貞
寶物古中尋
熱愛一切antiquepieces，不止衣衫鞋履飾物，巨細無遺還有畫作，銀器餐具茶具擺設，玻璃樽……等等，Monica表示這十多年認識了不少同道中人，互相交流，她說：「有一個建築師朋友，佢教識我收集古董，養份慢慢累積係好大器嘅一件事，亦都有香港朋友，佢哋用咗5英鎊買咗個相架送畀佢小朋友，佢嘅小朋友當時一啲興趣都冇，覺得價值唔大，到十年之後，我朋友拎呢個相架去拍賣會拍賣，結果有人用500英鎊投得，證明古董唔係垃圾。」
Homeless賺錢有道
一副弱質纖纖模樣的Monica，年前開始搞生意，絕對頭頭是道：在台北開設了古董店CherCher，家具家品店Homeless迄今已開了9間，茶館OneFineDay又再捲土重來，Monica說：「Homeless好賺錢，呢樣係一早估計得到嘅，我哋會再擴充，要打入中國市場。反而賣古董衫要出心出力多好多，回報唔算成正比，不過同同道中人分享係好開心嘅事，CherCher有條line會對顧客提供一個offer，只要畀件衫10個巴仙嘅錢，租畀佢，我哋當係收番乾洗費，顧客可以短暫擁有件衫，各取所需。」
