復建居屋嘅真正政策目標（policyobjective）究竟係點，政府一日未宣佈，大家都係靠估，不過搞政治之人，最叻就係講定先，政黨賴以贏取選票，政府賴以贏得民望，等到他日細節逐漸公佈，眾人不滿，又試大罵之前，起碼已是幾個月後嘅事情。嗱，特首要等到2011年十月先至宣讀施政報告，經過一輪諮詢，推行已在2012年三月後，到時曾特首已經預備搬屋，搞過渡咯，新特首在七月一日上任，會唔會照單全收曾特首政府之政策及細節，有疑問啫，到時再大調或微調嘅話，復建居屋未到2013年都唔會正式動工，第一批單位起好，出售之時，怕且已到2015，到時樓市是好是壞，樓價是升是跌，今日點估呀，今日未上車要求復建居屋者，到時可能已經有能力買到私樓或者家庭月收已由二萬七千元增加到三萬幾四萬，冇資格申請呢。
可以推論，復建居屋不是為了今天急於上車之較低薪中產（月收二萬七千元）而建。
申請居屋過往由公屋居民佔盡優勢。以2010年六月至七月出售居屋貨尾單位為例，單位總數3219個，白表獲分單位係四成，即1288個。白表申請人有32321人，白表中籤機會率等於3.985%，算係4%。綠表獲分配單位有1931個，綠表申請人（公屋居民）有6886人，綠表申請成功機會係28.04%，算28%。換言之，綠表申請人中獎機會比白表申請人高出7倍，白表申請人只係陪跑分子，中到籤要去還神。
如此說來，復建居屋不是為渴望上車之非公屋居民而設，而係延續、延伸公屋居民之福利。啲政客清楚明白呢一點，但佢地以中產代言人自居，十分虛偽。
復建居屋是否不會影響私樓價格？任何公地如不擺入勾地表而作興建居屋用途，意味私人樓宇單位「被擠出」（crowdedout），私樓供應減少，長期影響係樓價上升，令抽唔到居屋之中產邊緣人更加難上車！