夏天殺到埋身，又係龍友外出嘅peakseason！呢個季節無論大自然靚景，抑或街頭模都特別多，四出打龍啱晒！不過有時可能連個天都唔鍾意我，明明約好晒朋友聚會，無端端都有條海馬吹過。其實想堅持繼續「出龍」，一件相機雨褸當然唔少得，今次就搵嚟５款單反雨笠！
記者：王震遠
攝影：陳盛臣
Models：Alfred&Christie
1.最專業 取景更清
唔少副廠都會推出相機配件，但有些忠實粉絲會覺得原廠出品才夠專業。如果你對Canon死忠又想添置相機防水套，佳能就有ERC-E4這專為EOS單鏡反光相機而設的雨笠可選擇。ERC-E4共有S、M、L可選擇，除非用上大號定焦長鏡，否則最細的S碼已可應付一般需求，如28-300mm、70-200mm等等中長鏡都對應得到。
ERC-E4用上防水質料，跣水之餘可令龍友於雨中拍照，雨笠都可充份保護到機身和鏡頭。Canon相當細心，因一般的防水套都需要隔着膠窗觀看螢幕，但ERC-E4就特別設計接目環固定在取景器上，所以可更清晰進行構圖和拍攝；若果想要liveview模式來拍照，更可透過大型透明視窗來操控LCD螢幕。鏡頭筒上有魔術貼，防止水點由前方滲入，防水套後方更有拉繩收細洞口，除了給用家伸手進去之外，亦阻止水花濺進防水套內。
2.最多位 連頭笠
落雨時當然要第一時間護住所有攝影器材，但顧得部機時又顧唔到自己，相機配件商Kata就有辦法。E-705可在大雨的情況下保護相機，唔會因滲水而整壞。雨褸唔同市面上其他款式，一般相機雨褸只能夠放進一部相機，E-705的容納性很大，唔止可以放入長鏡，更可以加上閃光燈，最特別就係連個人都可以笠得到。E-705左右兩邊都有洞口方便攝影師插進雙手進行拍攝，更有索帶可以拉緊，令防水功能大大提高。
KataE-705$880
查詢電話：23276728（ManfrottoDistribution）
3.最有潛力 深潛5米
想雨天出街拍照，又想相機保護得更全面，專門為數碼相機推出防水用品的DiCAPac，就有一款專為單反而設的專門級防水套WP-S10。新改良版本有專利雙重防水設計，開口用上膠邊再向內摺，防水性能已通過日本最高第８級防水測試，直情可以抵受５米水深的水壓，唔止落雨影相無問題，去潛水用都仲得！防水套仲有變焦鏡頭相容設計，可以對應長鏡或短鏡使用，隨時可以拉長縮短。鏡頭前面亦有拆卸式防水鏡筒設計，整個蓋扭出嚟方便清理霧氣㖭！
WP-S10$980
查詢電話：23617228（DiCAPac）
4.最小巧 輕便風褸
唔係好多相機配件生產商有推出專門防水嘅攝影裝備，但係本地牌子Pierre&Paul就有一款。呢款SLRRainCover單反防水雨衣，專為落雨同雪地中拍攝而設，仲特別推出迷彩版，方便去到郊外打雀時可隱藏之用。雨褸用咗類似風褸質料，收摺起特別輕巧細小，方便隨時帶備。前方有索帶，可以包實鏡頭，設計根據不同機身、鏡頭大小嘅尺寸，測試時用Canon單反加小小白鏡頭都一樣保護得到。不過機身後方的取景器和屏幕就沒有保護到，橫風橫雨時使用就要小心一點。
P&P單反防水雨衣$78
查詢電話：35869689（Pierre&Paul）
5.最膠 平民雨笠
相機防水雨褸唔一定貴，鴨寮街瑩記一樣有平民版貨色出售，最抵嘅相機雨褸有CameraRainwear，只賣$48，算係最實惠之選。呢件雨褸得兩件組件，包括一大塊膠布和一支骨架。骨架需要插上熱靴位，可以自由伸縮長短，不過就唔算拉得長，70mm-200mm鏡頭已經係極限，C字形膠架用來固定位置。拿上手，膠布嘅手感就有啲「流」，好有國產feel，似乎唔用得幾多次，不過勝在夠平，就算用完即棄都抵玩。
CameraRainwear$48
查詢電話：27252373（瑩記貿易）