一班前輩嘅飯局，每兩星期舉行一次，最近一次在鏞記四樓舉行，Ｌ世伯上到去，經理連聲歡迎，原來經理已在鏞記打工四十幾年，四十年前已經為熟客Ｌ世伯服務，當然啦，Ｌ世伯曾為法資銀行首席華人代表，誰人不給面子三分。
人齊嘞，賓架Ｇ拿出六月十二日星期日之蘋果日報副刊俾我地睇，仲以為佢講左丁山㖭，誰知不然，賓架Ｇ施施然話：「大才子董橋講古董文物，呢日講到我地老友地產Ｃ以一百萬元買一枝筆，唔該睇吓！」得一份報紙，點睇呢？於是請侍應影印六份分嚟睇，但縮成A4紙，字體太細，好難睇得清楚，於是請在座嘅地產Ｃ講古仔，地產Ｃ係大收藏家，私藏一批珍品曾透過「敏求精舍」借俾藝術館展出，行內人一致讚嘆。地產Ｃ話佢在荷李活道東風閣偶遇董社長，談起古玩就一見如故。某年佢在日本東京日本橋一帶逛街，專睇古董，在某一老店見到一枝南宋漆器造嘅毛筆，收藏保存得極好，配上日本人特別為毛筆製造嘅木盒，非常鍾意，於是一口價（一百萬港元）買下。貴唔貴啲呀？地產Ｃ話：「而今一隻古琴都拍賣至一億元，相比起嚟，一枝筆一百萬元，平咗㖭，可能已增值不少。」
地產Ｃ作風低調，走在街上無人識，最合佢意，普通人那知道他是隱形富豪？若非董先生品題，佢點會講佢枝筆？世伯Ｌ要求佢以高清攝影之，然後精美印刷，製成明信片，送俾我欣賞吓，眾人連聲叫好，希望不日收貨！
賓架Ｎ遙想當年，往廣州參加春交會、秋交會，外國人羣相爭購玉石，佢因忙於工作及睇住啲下屬做嘢，根本冇時間周圍去睇玉石文物，家見到文物古玩咁值錢，不禁嘆一聲：「走寶！」內地富豪識貨也好，附庸風雅也好，一窩蜂咁搶高晒古董字畫嘅價錢，蔚為奇觀。呢個現象在「做又三十六，唔做又三十六」嘅財富分佈極平均年代（即係均貧），發夢都想唔到。打倒馬列史毛主義，中國人就有好日子過，真係要多謝鄧小平堅持改革開放，開門走資！