中視金橋（623）息率近5厘，主打瓣數又有超強增長，買入等向上爆。中視金橋主打祖國廣告媒體相關業務，往績PE得8倍單位數。家陣祖國廣告需求火紅，ChinaPlay當中，中視金橋PE勁平，見到已經流口水。喺上年底，集團為2011年獨家代理資源廣告預售，超過9.5億銀人仔，已經相當於2010年度（12月年結）總營業額近七成水位，2011年度業績已經坐定粒六。再講，集團家陣又揸住祖國央視多個電視欄目獨家承包權，加埋呢個優勢，照計，今年之內繼續肥仔水。中視金橋2011年度純利係咁意增長30%到2.05億銀人仔，預期PE進一步跌到得6倍水位。博中視金橋翻半番到3.97元，PE都上唔到雙位數。
保利達折讓超吸引
保利達資產（208）喺上星期五，一度質穿1蚊，創1年新低同時，日線圖9RSI跌到20樓下，勁超賣。又保利達現水位嘅NAV折讓挨近57%，澳門地產股當中，呢個折讓夠吸引。再講，集團大股東又係大孖沙柯為湘旗下九龍建業（034），夠晒睇頭。呢轉短打博升20%，保利達見1.20元，未有耐上到NAV2.30元水位。
錢雋