曾幾何時，球場上的勁人會被稱為球王，今時今日球王這個字眼好像已經不太流行。不是沒有超級球星，只是那幾位當時得令的都還相當年輕，叫球王好似老咗啲，於是有人稱他們為神級球員。
美洲國家盃在即，主辦國阿根廷有神級美斯在陣，照計形勢大好，兼且應該「借啲意」乘機捧番個盃；大佬，18年冇盃落手嘞！偏偏呢，又麻煩多多，萬事不順喎。
先講美斯，一返老家，竟然俾球迷襲擊，好彩打唔中啫，而那位「儍」球迷郁手原因是美斯以前的球隊是他的愛隊嘅仇口；此君好明顯其實是「偽球迷」，試問有那位球迷會將球會仇口帶去國家隊的呢？就算你係曼聯迷，見到美斯都想合照啦係咪？
神冇咁易被你埋到身郁手，之後美斯在友誼賽又入波又助攻，掂到飛起，點不知賽後又被當地報章批評他在開賽前奏國歌時唔唱埋一份，背後意思就係話佢唔夠愛國啦。
要吹毛求疵確實何患無辭，美斯個人低調啫，又唔得嘅。好明顯想話佢喺球會表現同喺國家隊不符啦。
大佬，我哋其實想睇佢入波，唔係唱歌囉！
都好嘅，搵嘢嘈吓多少會為美斯減壓，皆因阿根廷主辦得來，卻毫無霸氣。一來衰自己，因為政治原因，今次成個賽事竟然都安排喺小城市舉行，首都坐擁個全國十大球場，以及三分一人口，竟然只爭到一場決賽主辦權，認真冇面。本來原意係搞旺啲細城市，但遇着經濟大衰退，球場翻新都唔夠錢，配套自然唔好得去邊。
內憂之後仲有外患，先來日本隊退出（請唔好再問點解有日本隊），然後又咁唔好彩遇上智利火山爆發搞亂晒南美洲航空秩序，有心想去睇都未必去到啦。
如此環境，難得比利又出手抽水，被問到美斯幾時可以成為球王呢，比利答：「等佢入到我嘅紀錄1,281球先啦！」係囉阿根廷人，人必自侮而後侮之呀！
文：keyman