為免與UFO混淆，飛碟又名飛盤，而無論飛碟還是飛盤都勁飛得，而且老幼咸宜，香港飛盤代表隊，剛於上月中在北京再度贏了全國極限飛盤大賽冠軍，但原來飛碟運動，莫說街頭，甚至連公園、沙灘都唔俾玩，但一隻安全飛碟的發明可能改變世人睇法，會否因此而解放我們的沙灘，學學大連搞搞國際沙灘文化節呢？
記者：馮敏兒
攝影：譚盈傑、陳盛臣
Model：Nie@PureModels
獨家安全軟膠飛碟
雖然在香港海灘，例如深水灣、淺水灣，就算平日無人，都唔俾玩飛碟，因為康文署認定飛碟可以傷人，但在石澳海灘，在紅波之外就算周日都無人阻止我們玩飛碟，香港飛盤總會會長Apple唐麗娟指，飛盤運動其實並不如想像般危險，運動過程更充滿紳士風度，這日她就動員了一眾飛碟精英，連兩歲子女都出埋場，飛躍石澳，預祝解放沙灘成功在望呢！
真正比賽用的飛碟，因為撞擊後，盤邊會花，會崩缺，所以有機會磨傷皮膚，不過去年香港飛盤總會為了推廣運動，設計了一隻僅重115克的軟膠飛碟，又軟又輕，2歲小朋友都玩到，佢可能飛不過100米，但都有一定準確度，而且無論你如何擲都不會有危險，安全性堪稱無敵，就算被它打中身體也不會斷甲、傷頭，連小朋友都唔會哭呢！坊間無得賣，香港飛盤總會獨家售$50一隻，而比賽用的正規飛碟重175克，講求速度和準繩，有人徒手可以擲出過200米，坊間也沒得賣，他們$100有售。
極限飛碟玩法
極限飛盤（UltimateFrisbee）比賽是一項7人制對壘運動，不用龍門，毋須籃框，更拒絕裁判，比賽場地需要有共100米乘37米的草地或沙灘，差不多一個足球場大，每場比賽60-75分鐘，草地是7打7，每得一分都可以換人，沙灘則是5打5，4打4都有，例如他們將於8月2日到意大利參加的世界賽就是5打5。遊戲規則是通過傳擲，將飛碟投到自己一邊的得分區內，讓隊員接下就能得分，過程間不能讓飛碟落地或被對方打落或截得，接到碟的隊員要停下來，不能移動，像籃球一樣以單腳作支點走位，否則便犯規「走步」，並在10秒內把飛碟擲出，超時算犯規，要轉發球。Apple話，玩飛碟的運動量絕不遜於欖球、籃球，跑位、接碟，沒有半點時間喘息，堅持一場比賽下來，殊不容易，是意志和團隊精神的考驗。
手長腳長最啱玩
Apple說：「雖然係人都識玩飛碟，但技巧其實不簡單：有正手、反手、內彎、外彎、倒轉，而傳和接更是不易。正手的投擲方法，是以中指，將碟邊勾着，擲出時攤開雙手，順勢令它旋轉，需要用一點腕力；而反手基本動作是把拇指放在上面，4隻手指扣在下面；接飛碟時，我們通常會用雙手接，一上一下把它夾實，所以又叫pancake；如果高接，我們就要4隻手指向上，拇指在下，捕捉它；低接飛碟時，則要反轉，拇指在上，4指在下接。而單手接碟時，最重要還是順着飛碟來勢接碟，否則有機會從你的手中彈開！」Apple仲話如果要練到一身好本領，成為香港代表隊，約需1年時間，每星期練兩三次，而傳接練習最少要有2對2作對手，鍛煉手眼協調、速度、平衡、爆炸力、耐力通通需要，還要夠高，和強勁的彈跳力，因為要接高盤！Apple更說model阿Nie擁有飛碟運動員的理想條件，手長腳長，彈跳力又好！
基本技巧
