憑無綫歌唱比賽節目《超級巨聲2》一夜成名嘅小巨肺林欣彤（Mag），早前簽約英皇，噚日佢第一隻歌《洗澡》面世，英皇豪花6位數為佢搞記招，英皇、無綫高層當然力撐，陳偉霆、鍾舒漫、陳奐仁及巨聲幫成員等亦現身支持，容祖兒同林峯等就錄咗片段恭賀Mag。
下月滿21歲嘅Mag，喺台上見到班巨聲幫老友時一度熱淚盈眶，不過佢死忍眼淚，同緋聞男友羅孝勇仲好避忌，個個埋身吻賀Mag，羅孝勇就隔開幾丈遠兼只同Mag揮手。
拍拖唱好歌
Mag話預計8月出碟，家佢已經畢業，要兼顧嘅事少咗，佢話學識點將壓力轉為推動力。對於獲無綫力捧，年尾頒獎禮會同鄭欣宜爭新人獎，Mag話：「吓？我唔知，但會盡力。」Mag強調公司冇要求佢唔好拍拖，又話自己唔會避開感情，拍拖一定會公開，因為佢覺得拍拖同唱歌好有關係。
此外，同場嘅樂易玲話無綫小生花旦被偷拍，下周一四位藝人會去香港個人資料私隱專員公署投訴，樂易玲話公司一定支持。