「止於至善！」唔經唔覺，中文大學崇基書院原來已經春風化雨一個甲子，今年60周年慶祝，崇基決定大搞，而11月12日嘅60周年晚宴，應該係連串慶祝活動嘅高潮。華華八到，晚宴嘅籌委會主席，經已扑搥由金融管理局總裁陳德霖出任。
中大人Norman港大圈突圍
據華華了解，一向低調同唔太鍾意去蒲晚宴ball場嘅Norman，之所以肯做主席，其一，係對崇基有感情，其二，佢係中大榮譽院士，所以咪一口應承囉！
咁芸芸校友之中，點解要揀Norman呢？即係咁，無論當年定今日，由金管局以至金融界，十個有十個都係港大幫，系出中大嘅賓架，數來數去就只有剛剛榮休嘅獅子行首位華人大班鄭海泉，但鄭大班係新亞人而非崇基仔噃！
所以，1976年崇基社會學系畢業、當年乃中大首批獲聘加入政府做政務主任（AO）嘅Norman，家陣唔單止係賓架咁簡單，直頭管晒班賓架，係崇基之光！
至於Norman點解能夠喺港大圈中突圍而出，照華華估計，佢小學讀蘇浙，學得一口流利普通話，中學就係皇仁仔，接受殖民地優質教育，有咁好嘅底，要跑出，唔難！
mailto:[email protected]