孖轆界中嘅名牌Kawasaki，等同四個轆嘅林寶拉利地位，最新ZX-10R，霸氣外形再勁加青BB大包圍，爆起上嚟十足十綠燈俠飛嚟飛去，最正係首度加入循迹系統，新手更易掌握啡軨超跑。毋須戴戒指或搵電話亭，一撻匙，已變身成MarvelHero。
記者：徐影龍
攝影：譚盈傑
Model：Hidy@GME
螢光綠勁招積
Kawasaki上年到港嘅Z1000，已屬138匹跑車級別，賣點係向同廠老大哥致敬，加入大量ZX-10R特色落去，變成一等一高手嘅戰車。今日輪到呢位老大哥推出2011款，得睹全新ZX-10R真身，又確係幾霸氣橫溢；大幅勁加螢光綠色車身包圍，連輪圈、尾翼都換埋綠色配搭，比舊型號「青」得更徹底，綠燈俠揸住佢，仲型過孤獨地喺天空度飛，就算青蜂俠再拍續集，周董亦應該搵佢做座駕。
其實原廠Standard已經型到爆，今日呢部係藝員寧進最新座駕，佢同九成九玩跑車嘅人一樣，唔改唔安樂！激改補品，包括超過兩萬蚊嘅GPR鈦金屬尾喉、一萬蚊尾避震，仲有碳纖側鏡同裙邊裝飾等，電腦當然順勢Tune埋，馬力比原廠增強近30匹，不過所費不菲，連埋車價就超過20萬了，睇怕做綠燈俠同蝙蝠俠一樣，財力都要有番咁上下雄厚。
適時Cut油防打滑
性能同規格上，當然比Z1000更嚇人，同樣1,000cc級別，原廠無改已超過200匹，二波約8,000轉已達100km/h，仲有大把水位，都唔敢想像出力狠踩會有幾癲。
唔係個個都可以做《天若有情》嘅華Dee，呢類超跑馬力太大，非高手好易出事，好彩Kawasaki諗得周到，除分高中低三種動力模式外，仲首次加入自家TractionControl（循迹系統），名為S-KTRC，屬賽車式Trackion，勁到實時評估行車狀態，包括波段、轉數、油門位置、頭尾轆轉速等數據，再有效率地降低馬力同扭力，令車身入彎、落雨天時可迅速重獲抓地力，防止動力過猛而打滑空轉。而對住呢架200匹電子兇獸，套用寧進說話，就算技術不足嘅啡軨新手，都可循序漸進由低玩起，將動力模式由Low慢慢升至Full，玩乜都好，最緊要安全嘛。
