眾港姐前晚到達台灣阿里山，諗住噚日一早拍外景，點知當地由前晚起一直落雨，天氣仲突然轉凉，搞到班港姐要捱冷擔遮拍攝。而黎諾懿就接羅仲謙棒，陪港姐拍攝，佢同1號甄敏婷、2號關曉琳同3號許亦妮（Whitney）最多同場機會。
黎諾懿話對Whitney、5號朱晨麗同13號蔡慧欣印象較深，問黎諾懿係咪因為Whitney被爆不停媾仔所以先咁留意？佢話唔係，仲反問：「係咪真？佢都冇我。我同1、2及3號拍攝時佢哋都好乖，咁辛苦都冇怨言。」問黎諾懿會唔會同Whitney特別多溝通？佢話：「冇，但我都要有男士風度拖吓佢哋。」對於拖手一事，Whitney煞有介事話：「我都係拖女仔多。」擺明怕惹緋聞。但黎諾懿話真係有拖佢手，Whitney即扮失憶：「冇印象，我自己會小心行路。」
自認大食
今日港姐又會着泳衣拍攝，日前Whitney着泳衣時明顯有啲肥，佢話會忍口，因自己大食，胃口勁過男仔，問佢怕唔怕嚇親異性？佢話：「唔怕，做番自己啫。」上圍好勁嘅15號梁蔚翎話面對咁多鏡頭唔太習慣，又話自己身材唔算出眾，連日嚟見佢好少埋堆，唔通被杯葛？佢話係自己怕醜，其他佳麗不知對佢幾好。
