家長K有位叻女，除咗讀書成績唔錯，在地區著名英中屬於優秀學生之外，拉小提琴亦好叻，前年已考到八級證書，明年考第一屆高中文憑試嘞，話要趁暑假狂谷，考埋演奏級。問家長K：「學小提琴要幾多錢？」家長K答：「我有優惠價，老師好錫我個女，每四十五分鐘只收七百元！佢仲介紹埋一啲初入門學生畀我個女教，每小時收一百五十元，可以幫補吓。」
每節四十五分鐘，收七百，一個月學幾多節，冇問到，諗吓計吓，一個月咪要一萬元，走唔甩！家長K只是尋常百姓屋苑居民，並非住在天匯、天璽、凱旋門，係典型中產，咁捨得為培養女兒之小提琴技藝，認真難得。既然係咁，都費事問佢有冇認為教科書價貴唔貴咯，即使係一年三千蚊，相比於每年小提琴學費，濕碎啦。
能夠有機會學樂器，學得掂嘅話，終生受用不盡，食物及衞生局副局長梁卓偉富有音樂才華，務政之餘，會露番兩手，擔任樂團指揮，技驚四座。前民政事務局局長何志平醫生係小提琴高手，人所共知。上月底，左丁山一家之家庭醫生H六十歲生辰，一對孖生千金為佢在山光道馬會青雲閣慶祝六十大壽，醫生H開心到極，上台娛賓，原來佢自細就玩結他，嗰晚改任鼓手，與女婿、舅仔、弟弟夾band，有板有眼，佢話呢隊樂隊就叫做FamilyAffairs，平時都有玩開，一家高興。
醫生H點解有時間玩音樂呢？左丁山百思不得其解，佢每日上午八時開始在中產屋苑嘅醫務所診病，一時後就衝往中環，兩點鐘後在名醫雲集嘅大廈見病人診症，五時後又返回屋苑醫務所，經常睇到八點幾先至收工，每日揸車經過兩條隧道，星期六上午只開中環，星期日全日休息。左丁山經常懷疑醫生身體係鐵造嘅，又或者做到醫生嘅都係聰明之士，故此樣樣皆能。事實上，香港醫生全是讀書尖子，成績差些少都入唔到醫學院，故此香港嘅醫生比率偏低，每一千人先至有一點八個（2009年政府數字），英國有二點八個，芬蘭有四點五個，香港嘅醫生比率咁低，難怪有人提出要輸入醫生。