一朝天子一朝臣，係自古不變定律，但好似麥利殊只係落實任教阿士東維拉幾日，即刻炒咗蘇格蘭同鄉麥阿里士打，上演一幕「老麥」炒「老麥」，同場加映請食無情雞，主角係法國藉助教杜禾尼。之後麥利殊喺禮拜二再開殺戒，炒埋首席球探同埋體能教練，連斬4人都算幾狠。麥利殊以前喺伯明翰處處受制，家陣喺維拉大權在握，終於展現狠辣作風。
52歲嘅麥利殊嚟到維拉化身為劊子手，仲要係快刀斬亂麻；早排至喺巴巴多斯度假嘅麥阿里士打，真係俾人處斬完都未知咩事。好啦，前日輪到首席球探富斯路，同埋舊年喺法國國家隊同曼聯後衞艾拉炒大鑊嘅體能教練杜禾尼。麥利殊已經準備好一旦助手彼得格蘭同伯明翰傾掂賠償，就即時將佢帶嚟維拉，又會將伯明翰降班後即被楊家誠炒魷嘅球探保羅蒙哥馬利再收為己用。
想當日麥利殊喺伯明翰處處受制於領導層，又驚無錢擴軍，又驚自己帥位不保，家陣可盡操生殺大權，唔怪得就算受伯明翰同埋維拉球迷發出死亡威脅，一樣在所不計要過檔。
曉頓落實教伯明翰
查實你可以話麥利殊狠辣，但亦可以話佢唔想浪費時間，於是向前朝舊臣痛下毒手，其實亦無可厚非。因為健康問題而離任嘅侯利亞，冇話贊成麥利殊四圍開刀，但就呼籲大家畀個機會麥利殊：「艾邦拉荷叫球迷畀機會麥利殊，我完全同意，我識咗佢好耐，佢係個好人，由佢領軍係深慶得人。」
講番麥利殊前效球會伯明翰，公佈老麥嘅繼任人選，就係舊年年尾被紐卡素炒魷後一直無嘢撈嘅曉頓（圖），佢成功打敗迪馬堤奧贏得呢份差事，不過要帶領大換血嘅伯明翰重返英超，呢條路唔易行喎。