自從黃宗澤（Bosco）從容面對自己被刊登嘅晒雀相，周遭嘅人都好鍾意圍住同佢玩，噚日佢有份演嘅無綫新劇《潛行狙擊》喺將軍澳電視廣播城拜神，佢一身潮服，但就講起內褲廣告：「泳褲廣告我OK，內褲都冇問題，都係三角褲，到呢個地步冇乜唔OK。」
問到Bosco大可以考慮拍三級片，佢話：「有需要，有價值，露無妨，梁朝偉都可以咁專業，我唔怕為藝術犧牲，只要係劇情需要。」呢個諗法唔知係晒雀照前，定係後興起？佢好堅定咁話：「我不嬲咁諗，預咗拍劇係會有需要。」又有傳Bosco唔肯同無綫簽長約跳草裙舞被雪，佢話：「我冇，約仲有好幾年，年年有加薪，冇諗過走呢個問題。」
天華驚嚇親街坊
同劇嘅謝天華同Bosco合照時，扮Bosco擺裸照甫士，講到Bosco嘅裸照，天華話：「張相個甫士係幾sexy，成個身形、shape都好靚呀！」但係天華就絕對唔會露台晒雀，佢話：「我屋企對面好多樓景，我驚騷擾到啲街坊，煮煮吓餸突然炒燶菜又賴我，咁點算呢！」怕唔怕身形會比下去，佢即刻自信咁話：「唔知喇，我未除過。我喺新電影會有心理準備有呢啲鏡頭，會操fit啲。」