花旗股市前晚繼續反彈，道指正逼近12200，呢個位阻力好大，升破睇12600，受阻回落好大機會要下試11800。歐洲仲係立立亂，格林斯潘早幾日講過，希臘好大機會違約，如果佢老人家講中，市場會有一番大震盪。
港股噚日終於做番齣好戲，恒指反彈251點，報收21850，成交只係一般，唔夠700億。家市場氣氛麻麻，恒指上到22100附近相信會有好大阻力。
蒙牛C輪12436：蒙牛乳業（2319）收26.25元，升4.3%。股價喺24至25元之間已經拉鋸咗好耐，噚日大成交炒上打破橫行格局，RSI同MACD都有睇頭，短線好大機會上試28元，破位睇29元，可以諗吓隻C輪12436。
隻輪現價23.3仙，2012年1月6日到期，行使價28元，溢價15.5%，引伸波幅38.7%，槓桿率11.3倍（有效5.3倍），正股升上29元，12436睇38.1仙，正股跌穿25.20元就沽咗隻輪。
俊樺