Phaeton富豪約會　4D氣派

等了又等，全新Phaeton終於到港。貴為百萬級旗艦豪轎，準車主全部非富則貴，VW索性重金打造VIP貴賓室招呼佢哋，單計Present器材已有65"LCD同藍光碟機，簡直同戲院有得揮。3D電影？Out喇，即場仲可以試坐新Phaeton，直情係4D享受啦。

記者：徐影龍
攝影：周旭文
Model：Roxanne

筆者早前已喺海南島三亞，實戰過最新款Phaeton，呢架富豪座駕喺抵港之時，香港VW亦重金為佢打造專用會客室，證明廠方相當睇好呢架新車。
貴為旗艦級，Phaeton喺外觀上保留傳統VWStyle之餘，線條亦採用更穩重豪華嘅設計，大量電鍍飾邊令觀感上更具氣派，頭燈具有LED轉向功能外，更附設雙HID燈，日光日白走在街上，仍見到佢凌厲有台型嘅氣勢。可能你會覺得，賣相好鬼VW，望落熟口熟面，但一走入內櫳，你會驚覺福士玩貴嘢都有一手；木紋飾板繁多，配上高級真皮內櫳，再以銀邊適量點綴，全部都係人手打造，真係有種令人感到走入豪宅嘅氣派；車廂超級闊落唔在講，座椅更獲德國醫師聯盟AGR評選為最符合人體工學，乘坐感到觸感都咁軟綿綿舒服，老闆坐上去，咩生意壓力都盡消啦。

■車廂闊落得有點過份，感覺有如坐上路上豪宅。

■內櫳採用大量高級材質，而且全人手打造，零舍矜貴。

■中控台上方設有石英鐘，別具典雅高貴。

■雙出式尾喉隱藏喺尾泵把，觀感更佳。

新Phaeton喺性能及操控方面，亦非省油的燈，全系列共三款引擎配置，最強為6,000ccW12，馬力達到450匹，成熟穩重骨子裏，有着跑車級性能。而上次海南島試車版本跟香港Showroom嘅4.2V8不同，為3.6LV6型號，馬力雖降至280匹，但已經好夠揸。在海南島一列一列酒店區外嘅馬路，又長又直，可一路肆意直奔往名勝天涯海角，V6引擎盡情發揮，憑住4Motion系統，就算舞住咁大架車，過彎或輾過凹凸泥路，Phaeton依然穩如泰山，不知不覺間，我已經無當佢係一架豪華轎車，錫住慢慢揸，反而沉醉於強勁性能之下，踩出280匹熱血表現。

■三亞路多車少，可盡情發揮Phaeton強悍性能。

■大量電子輔助系統，令操控靈活更輕鬆。

■實試百萬名車一樣唔就住，狠踩凹凸爛路依然四平八穩。

■VIP房近500呎，鋪晒柚木地板同設有高格調梳化，配埋65"Aquos高清大電視，簡直可視為高級影音室。拉開一邊實心木屏風，就會見到心愛Phaeton泊正喺隔籬。

■設有Bar台同雪櫃，天時暑熱試完車，最好嘆番杯香檳，同Sales傾吓新車點樣作個人化配搭。

■用上先鋒藍光碟機，最正係法國發燒級YBA擴音同喇叭，播住一系列VW靚車宣傳片，猶如睇緊荷李活電影Trailer咁震撼。