太陽射住頭殼頂，點可以唔濕身？一於包船出海喪玩香蕉船加Wakeboard，再落海灘Chok個靚樣掟番上facebook。玩到筋疲力盡，有快艇火熱送上創新脂鱗卷燒，魚鱗勁脆，一般日本餐廳無得食，邊個話到會唔慌有好嘢食？我會用法式乳豬同阿拉斯加蟹塞住佢把口。
記者：徐務研
攝影：陳盛臣
Model：Siena、Michelle、Howard@StarzPeople
一條龍任玩水上活動
夏天Hot爆想濕身，不過搞遊船河真係好頭痕，一煩格價，唔知頭唔知路驚俾人坐地起價；二煩各類水上玩意唔係逐小時計就係逐桶油計，玩到夠鐘就要閃人，焗你計住計住咁玩，一船出海廿幾三十人，分分鐘爭玩爭到反面；三煩食物，到會十年不變次次都係菠蘿腸仔肉醬意粉，想食得好啲都難。
上網，盲舂舂搵到「SAIKUNGBOOKING28.COM」，今年開業，專承包遊船河服務，交通、遊艇包船、各類水上活動、到會、晚飯甚至泊車都一手包辦，啱晒怕煩嘅你同我。細問，原來搞手係班土生土長嘅西貢人，合夥人之一嘅Jacky話：「成日有朋友問我點搞西貢船P，問得多，我咪把心一橫自己搞呢盤生意囉。」消費最緊要眉精眼企，講多無謂，價錢點計先？「我本身認識好多船家，可以直接聯絡佢哋，少一層中間人，所以唔使額外收客人佣金，價錢肯定比坊間一般Agency平。唔包食物，最低消費包中式遊艇連快艇$3,800起，香蕉船同Wakeboard任玩唔嬲，唔會逐桶油計，你鍾意玩幾耐都得，」Jacky：「我哋係地頭蟲，基本上試勻晒所有到會，自然識飲識食，推介得畀你嘅到會，質素肯定有保證。」佢推介「CowBoyBBQ刺身生蠔火鍋食品專門店」，質素果然唔錯。
船家教玩Wakeboard
拉隊開船P，齋坐等食好悶，梗要搵啲水上活動玩吓，Siena大呻唔識玩Wakeboard，熱情船家信心保證：「我教你，包你學識。」拍完心口，佢雞啄唔斷開Lecture：「千祈唔好用手鬥力，要用腰力，一起到水就要扭腰，等塊板食水。」船家認真教，Siena認真學，都算佢冰雪聰明，試玩到第三次已經起到水，雖則曇花一現就跌番落水，但比起貪生怕死只看不試嘅我，已經值得掌聲鼓勵。都無謂叫Siena作無謂掙扎，我叫船家露兩手，只見他Wake足十分鐘，又換手又凌空飛起，乜花式都玩勻，有姿態又有實際，Man到暈。
唔識玩Wakeboard？Fine，就玩啲自己唔使點郁嘅水上玩意啦，Siena搭實船家玩水上電單車，風馳電掣都不知幾爽。香蕉船就更加無可能唔玩，排排坐等船家一個飄移甩尾撻你落水，又係過癮啫。
齊來濕身
搶食BB豬
玩到疲，肚打鼓咁聲，係時候上水醫肚。有時我會諗，乜到會都好，擺上船幾粒鐘，講真同冷飯菜汁無乜分別，好彩世事無絕對，只見一架小艇駛來，新鮮滾熱辣到會即送即食，絕對驚喜呀！只要新鮮夠熱，叫我喫菠蘿腸仔都心甘命抵，點知打開一睇仲驚喜！有無眼花？竟然有乳豬、阿拉斯加蟹同生蠔！
到會食物由「CowBoyBBQ刺身生蠔火鍋食品專門店」一手包辦，老闆當過廚，從事海產批發廿幾年，所以食物價錢既平又有質素，唔食真係對自己唔住。萬二分推介脂鱗卷燒，名字有氣勢，聞所未聞絕對獨家，老闆：「食材雖然唔貴，但製作工序好繁複，三文魚魚鱗曬乾再炸，辟腥又脆口，配青瓜同沙律醬捲起，上放用秘製醬汁醃過嘅三文魚皮，上碟之前再用火槍燒一燒，搞掂！」我試過，三文魚皮入口即溶，微辛醬汁勁惹味，魚鱗勁香脆。不過論到最有氣勢，非法式BB豬莫屬，五磅重BB豬肉嫩皮脆，醃足一晚夠入味，用三種香草、法國芥辣同黑椒醬汁焗過，係搶食之選。
抵食阿拉斯加蟹
天氣咁熱又點少得冰凍海鮮，先來個阿拉斯加蟹消消暑，老闆精挑細選智利阿拉斯加蟹，肉厚飽滿又鮮甜，坊間每隻$680，老闆本身做批發，大大隻蟹賣$450。抵？未算，仲有鮮甜韓國馬糞海膽每板$68，保證食到你舔舔脷。生蠔亦有多款選擇，今次有爽口嘅澳洲CoffinBay、鮮甜飽滿嘅美國太平洋、海水味濃嘅蘇格蘭蠔同肉厚美國珍寶蠔，一啖一隻不知幾爽。咁啱有壽星仔女上船？船P變埋生日Party，梗要食番個魚生蛋糕賀一賀佢，魚生蛋糕唔係得個樣，餡料有三文魚、希靈魚子、魷魚同牡丹蝦，餅底則有蟹子及蛋黃拌飯，插支蠟燭一吹，Happybirthday嗰隻啦。
一船壯男驚唔夠食，Order多個雜錦壽司拼盤穩陣，有齊三文魚、蟹子、魷魚同吞拿魚等大路壽司，每件$5抵食過迴轉壽司。雜式火腿拼盤都要讚，除有多款火腿片任君選擇外，當中嘅雞肉鵝肝卷更由自家工場出產，火腿片釀入鵝肝，香滑豐腴，Heavy？好味就話知佢啦。汁煮日式叉燒都係自製，捲起豬腩肉燒好外皮，用日式醬汁煮四十五分鐘至入味，油香十足超Juicy。另一道法式牛尾煲，焗好巴西牛尾後，配雜菜同紅酒醬汁慢火煮兩小時，又係好味都停唔到口。
查詢資料
CowBoyBBQ刺身生蠔火鍋食品專門店（23338218）
地址：西貢宜春街66號地舖6室
SAIKUNGBOOKING28.COM（65162828）
收費：中式遊艇包船$3,800起（20人），包香蕉船、Wakeboard
網址： http://www.saikungbooking28.com