性質上，呢一餐係私房菜，不過上船食，順便可以遊埋船河咁解。遊艇裝修過千萬，配套齊備，師傅上船即叫即煮，海鮮天天運到，對住無敵海景擦大大隻避風塘炒蟹，食埋靚景，呢一餐正到無嘢可講啦。
記者：徐務研
攝影：王文忠
Model：Alina
洗手間連浴室
「雅迪國際遊艇會」搞嘅係非一般船P，豪華遊艇裝修過千萬，有五百呎大廳、VIP房同三間客房，間間房都有卡拉OK，連PS3體感遊戲都有得玩，洗手間有兩個，連浴室都有，女生玩完一日可以慢慢執番靚個樣先落船。呢架遊艇平時做開維港遊同包艇辦婚宴，最多六圍，有經驗豐富嘅師傅即煮美味私房菜，質素一定唔失禮。如果想包艇出海遊船河？得，去邊玩乜價錢面議，唔該提早預訂。
Alina登上豪華遊艇，表現勁興奮，第一時間換上靚靚三點式，走出甲板伸個大懶腰，吹飽風落番船艙大唱卡拉OK，無呃你，未算聽出耳油，但又真係幾好聽。
豪裝一覽
龍躉帶子炒飯
私房菜方面，大廚陳師傅有三十五年入廚經驗，為人風趣鬼馬，精心炮製嘅前菜有桂花淮山、鹽酥豆腐同冰鎮苦瓜，好味！「呢個避風塘炒蟹，炒得乾身入味，辣度剛剛好，唔會掩過蟹鮮味。」佢遞隻蟹箝畀我，我梗唔客氣即試，結論係肉質結實無離殼，炒得勁入味，斤半重泰國肉蟹非常啖啖肉，「我絕對唔會加味精，食完都唔會口渴o架。」一個字講晒──正。
金柱海鮮炒飯亦係驚喜作，飯粒炒得勁香脆，瑤柱炸過脆卜卜，配料有帶子粒、蝦粒同龍躉肉，果然富貴。蒜茸清蒸蟶子皇又係正啫，新西蘭蟶子夠大隻肉厚，絕無泥味，簡單放粉絲同蒜茸一蒸，鮮甜度已經滿分。另一道果皮絲蒸南非鮑魚，鮑魚肉質煙韌有咬口，一咬果皮香直衝入鼻腔，絕讚！上湯焗龍蝦選用本地龍蝦，尾部特別好肉地，用秘製上湯燜焗，蝦味濃郁，上湯有助提鮮。
雅迪國際遊艇會（27357878）
網址： http://www.adela.com.hk
收費：
1.以上介紹為維港遊7餸私房菜，每位$888（四人起）
2.包船遊船河平日$15,000起，不包食物，地點面議；若另加私房菜，每圍$6,000起，菜式會因時令及客人要求稍作改動。