龍舟賽老娘有火
馮仁昭四圍超：白姐姐高衩泳衣退12港男 - 馮仁昭

國際龍舟邀請賽噚日喺尖沙嘴海旁舉行，今屆香港先生組隊參與傳媒盃賽事，但12位猛男都唔及白韻琴咁吸引，白姐姐噚日着上高衩泳衣，同男友謝偉俊結伴參與名人划浴缸比賽，令現場火熱高溫更火辣，郭晉安都有參與，不過焦點當然喺晒白姐姐度，街坊、遊客同參賽者見到白姐姐以泳裝出場，即刻邊尖叫邊細聲討論，謝偉俊就好少理，仲細心幫白姐姐扣好救生衣。

港男反艇

講到水上活動，白姐姐自認高手未驚過：「我以前教人滑水，第一件事要學點跌落水，唔驚反艇。」郭晉安賽前亦有同白姐姐交流心得，安仔賽後話從未划過艇，估唔到划浴缸要用盡全身氣力，慶幸順利完成賽事。
喺14隊參賽嘅傳媒盃隊伍中，TVB2隊勝出賽事，但港男隊就因龍舟反咗被取消資格，其中7肖偉賽前話，雖然只係練習過一次，但有信心唔會包尾，點知真係冇包尾，但就連賽事都完成唔到，真係失威。