金銀業貿易場理事長張德熙貼金價準，冇人質疑，但佢貼科技走勢又點睇？佢聲言，今年一定會出iPhone5！
「今年一定出iPhone5」
話說金銀業貿易場上星期尾搞咗場祝捷會，席間張德熙拎住部iPhone3，華華呢個iPhone4用家好自然問佢點解唔換機。張德熙話，佢早排跌咗部iPhone4落馬桶，如斯大意皆因當時太專心睇緊新聞，理論上佢係應該買過部新機，但佢堅信蘋果公司今年內一定出iPhone5，要等埋先買新機。咁肯定，唔通佢同喬布斯傾過偈？
講番佢至強嗰瓣──金，張德熙年初預測金價突破1500蚊美金，中咗！華華問佢，近日股市食咗瀉藥，係咪應該由股轉金？點知佢話，個市跌到21000點就會入貨。
咁唔知iPhone5出先定係港股跌到21000點先呢呵？