今日是父親節，城中名人藝人齊齊出動慶祝，其中賭王何鴻燊的12歲孻女何超欣前晚偕賭王嘆意大利菜提前慶祝，又買了大批賭王愛吃的食品來冧父親。不過，前晚同樣跟囝囝和太太袁詠儀提前慶祝的張智霖（Chilam），嘆意大利菜之餘還獲贈「牛肉乾」一張，因他違例泊車被抄牌，令Chilam大感冇癮。
現年89歲的賭王何鴻燊一向愛到銅鑼灣的daDomenico食意大利菜，識做的孻女超欣前晚遂偕賭王和母親梁安琪到該餐廳食飯，提前慶祝父親節。賭王逗留至晚上9時許便偕超欣離開，並由四太埋單，記者見枱面上食物包括青口、意大利粉和紅酒等全部掃清，僅剩下少許麪包，可見賭王十分好胃口。
記者問賭王是否提前慶祝父親節，賭王只笑住揮一揮手，而四太則謂：「食吓飯啫！」問超欣送甚麼禮物給賭王？四太說：「買咗好多佢鍾意食嘅嘢畀佢。」說罷便隨賭王的福祉車離開，而超欣則偕另外兩親友乘四太的座駕回家。
張智霖違例泊車
除賭王外，張智霖與袁詠儀和囝囝張慕童（魔童）一家三口亦在daDomenico開餐提早慶祝父親節。不過，Chilam將其平治座駕停泊在餐廳對面雙黃線位，結果因違例泊車被抄牌。Chilam於晚上9時許走出餐廳門口欲看看座駕有否被抄牌，但當記者告知他已被抄牌時，他即甚為冇癮說：「又唔叫我！家去睇都冇用啦！」說罷便折返餐廳，逗留至晚上9時半就偕靚靚及魔童離開。問Chilam囝囝有否送他父親節禮物？Chilam苦笑謂：「有就好啦！」
甘比帶女陪大劉
此外，劉鑾雄（大劉）昨午亦偕女友陳凱韻（甘比）及囡囡秀樺到灣仔福臨門預祝父親節，身穿牛仔布連身裙的甘比如常地拿Hermès手袋，手抱小秀樺現身。另外，前港姐冠軍翁嘉穗與夫婿鄔友正則陪男長輩到福臨門嘆茶。
採訪、攝影：羅德光、彭琮然、盧妹