正如未報名已經朝朝早出來晨操嘅唐唐所講，香港唔存在地產霸權，有嘅只係霸氣豪宅。八方今日帶大家去睇樓，呢個單位盡顯霸氣，唔單止位居天下正中，同意大利比薩斜塔一脈相連，海景園景山景悉隨尊便，絕對係80後上車嘅必然首選。
呢個霸氣樓王名叫「比薩．斜塔」，會唔會浮誇咗啲？誇得過「比華利山」、「凱旋門」、「日出康城」？唔好講咁多，介紹吓個盤先。呢度喺太子鬧市，佔盡地利。再睇內櫳，嘩！八方入到去，即刻有置身歐陸帝皇宮殿嘅感覺，又吊燈又木雕，即時覺得升呢咗做豪宅業主。
80後藝術家惡搞傑作
經紀話，呢個係複式單位，點複式法？設計師匠心獨運，喺單位一邊上下間開一半，上格做床，下格做飯枱。咁樣計起來，本來150呎嘅單位，當堂多咗50呎空間，仲做到複式嘅效果。冇錯個單位係細咗小小，連窗都冇，不過唔緊要，設計師安裝咗個投影機，只要將世界各地四季景致投影到牆上，好過開窗吸廢氣喇。
講到呢度，大家係唔係覺得越來越唔對路，有中伏嘅感覺？冇錯，認真你就輸了。查實呢個所謂示範單位，係一班80後藝術家嘅惡搞傑作，而玩嘢嘅背後，係嚴肅嘅社會現象反思。呢個係藝術團體「老實社團」嘅作品，「比薩．斜塔」呢個名，係諷刺緊香港人既受高樓價之苦、但又炒埋一份嘅矛盾心態。策劃人王浩賢話，比薩．斜塔越來越斜，有倒塌危機，於是乎意大利人要設法扶番正佢，之但係扶得太正，又會失去旅遊觀光嘅吸引力。
反映香港人畸形心態
香港人對待樓市就如意大利人對待比薩斜塔一樣，樓價高企，好多人埋怨做房奴，但詛咒地產商之餘，同時又做同謀共犯，又想住平樓又想物業升值。王浩賢話，我哋每個人心目中都有一座比薩斜塔，郁不得其正。
老實社團成員個個都係無殼蝸牛，成員李以進話，佢唔係冇諗過買樓，但係樓價長年高企，諗到餘生唔知幾多十年都要被樓按綁死，惟有打消上車念頭。講開「上車」呢個詞語，李以進話已經反映咗香港人對待住屋嘅畸形心態。房屋係用來住嘅，點解會變成車？就係好多人買樓時都諗住隨時賣樓，升值時賺一筆，將安居嘅不動產變做隨時甩手嘅投資工具。無論有殼定冇殼嘅你，今晚夜闌人靜嘅時候，不妨揳高枕頭反思一下，大家係咪都有份造就地產霸權？
mailto:[email protected]
要簽「愛的宣言」
睇完「比薩．斜塔」嘅客人，經紀會要求佢哋喺張紙上面簽個字。張紙寫咗一段「愛的宣言」，當然又係玩嘢。宣言好刻骨銘心咁描繪咗房奴與房之間不離不棄嘅纏綿關係，賺人熱淚，睇到八方都眼濕濕、頭耷耷：
「本人願意由今天開始，不論健康疾病，富有貧窮，泡沫爆破，始終忠於香港人的承諾，與比薩斜塔同在，直到永遠永遠。我內心知道，樓市將成為我終身的朋友、伴侶、我唯一的真愛。愛，是恒久忍耐。市，是永不止息。就算馬不再跑、舞沒有人跳；就算露台並不環保。面積一直發水；就算海景只得一寸、屏風樓使人窒息，我仍將永遠守護在樓市身旁，以它為榮，盡我所能供應它需要，愛它甚至多於我自己。」
睇「樓」須預約
想參觀「比薩．斜塔」示範單位，要預約o架。呢個樓盤會展覽到7月24日，逢星期五、六、日，下晝到黃昏。話係示範單位，其實係一班關心社會嘅藝術家嘔心瀝血之作，佢哋經費唔多，淨係「比薩．斜塔」個場租，都要每月$3,700，所以導賞團都要酌量收費每位30蚊，全程一小時。
乜睇個豆膶咁細嘅樓盤都要一粒鐘咁耐咩？「老實社團」惡搞得來好認真o架，佢哋專程喺演藝學院聘用咗幾個學生扮演地產經紀，向導賞團嘅團友示範經紀點樣將一個劣質樓盤美化成優質筍盤。大家參觀完，仲可以同策展人交流心聲。預約方法如下：
預約電話：96734989王先生
電郵：mailto:[email protected]
電郵標題請註明「我要睇豪宅」