香港大律師公會向來出晒力捍衞香港嘅人權同自由，好似政府最近建議修改立法會替補機制，規定議員主動辭職後市民冇得再投票，由原本輸咗嘅最高得票人頂上就算數，自然睇到唔少大狀眼火爆，日前公會就出嚴厲聲明批評有關機制違反《基本法》，好多市民為佢哋見義勇為拍爛手掌。
原來喺出聲明嘅前幾日，公會先至去完北京訪問，其間仲同唔少官員，例如國務院港澳辦副主任張曉明、最高人民法院副院長同司法部副部長等人會面，估唔到返港後唔夠幾日就硬政府，反映公會天生一副硬骨頭，唔向北京賣賬。香港律師會今次冇同公會一齊發聲明，唔會係支持政府呢個建議啩？