今時今日人人都有部相機喺袋，仲會將精選傑作放上facebook，當係個人展覽咁任人參觀，真係有相機都可以做攝影大師。不過有時想炮製傑作，唔一定要靠晒器材，講到底構思先係張相嘅靈魂，就好似時下流行嘅仆街、浮游等玩法都大受歡迎，今次就教你點仆街！
記者：王震遠
攝影：林栢鈞
Model：Clarisse@PureModels
No.1 仆街入鏡 最靠腰力
如果今時今日有幸在街上遇到有路人無故仆直，有留意開facebook都知道佢唔係行乞，而係抄緊台灣「仆街少女」影相。呢股仆街熱潮近期非常流行，事關兩個少女舉動叫人嘩然，原來佢哋無非想借仆街引人注意，順便介紹吓台灣風景，但以為佢哋係原創就大錯特錯，咁啜核嘅玩法早喺97年嘅英國北部興起，直到今年先忽然再炒起。
單講攝影技術唔算難，只要夠光環境就玩得。構圖方面，建議將主角置中兼成水平，因為打橫先睇得到佢有幾直。選址地點越旺越好，只要唔阻街應該無人夠膽打攪你，安全性亦好重要，今年5月澳洲就有一名男人仆落街身亡，要量力而為。另外要有「演技」，搵Model親身測試過，佢話仆落樓梯腰和膊碩要夠力，仲好易整傷心口，分分鐘整傷事業線。
No.2 浮游空中 凌空漫步
仆街少女未Hit之前，網上亦流傳另一種創意攝影手法，就是由東京少女Natsumi帶起的「浮游」。照片睇起來就似好輕功上身，主角進入咗無重狀況，但身邊嘅人同事物卻如常，所以造成很大對比。
玩法唔止要主角跳起咁簡單，仲要配合硬直動作加木訥表情，例如留意腳掌和腰部不要太彎曲，長頭髮最好先紮起，照片看起來才會覺得自然。選址方面，一定要在光源非常充足的地方，在ISO和光圈符合正常曝光的前提下，應將快門設定得快一點，背景和主體才會協調，亦較易捕捉被攝者跳到最高點那刻。若想命中率高一點，可以運用相機中的連拍功能，時下已有相機每秒拍攝至十張以上，試跳幾次總有一張「浮得起」。
No.3 多重曝光 創意Crossover
有玩過LOMO的應該聽過「多重曝光」，就係指在同一格菲林上多次攝影，就會有印象重叠的效果。器材方面相機需要有多重曝光的功能，在市面上中高階單反內可找到。想做出明顯的輪廓，主體背景建議用白色，再用閃光燈做成過度曝光，再啟動「多」功能後，照片深色的位置就會給另一相片叠上，造成像是合成的照片。
No.4 牆上影射 無限變大
呢個投射效果熟口熟面，因為相信人人在小學的時候都試過在燈前用手掌扮狗，呢招牆上投影就係用上呢個原理。要做到放大的效果，燈與牆的距離一定要夠遠，主角站在牆前可以擺出不同的動作，例如給巨手扯起或摔死等等，或扮成腳癬靈廣告都可，攝影技巧方面只要有足夠的曝光便成，另可在人像上補上閃光燈。
No.5 猜猜畫畫 電筒做筆
在照片上畫相唔一定要用筆，用一支電筒也可以！相片內的圖晝，由光線組成，在拍攝過程中，攝影師在暗黑環境，按下快門後，凌空在構圖上畫出各式各樣的圖樣，純粹要靠憑空想像。在相機方面，須要用到長時間曝光的功能，建議設定在15秒，另外因為快門長時間開啟，所以必定要用上腳架以防手震令相片模糊。
