張栢芝婚變進入白熱化階段，栢芝前度陳曉東近期都情變，佢同台灣Ccup女友魏蔓分手，不過分手原因就同錢銀、第三者無關，而係話女友聽唔明佢嘅廣東話，睇嚟東東認真大男人！
交往半年吵大鑊
35歲嘅陳曉東舊年同內地女模丹丹拍拖，仲去到談婚論嫁嘅階段，不過轉頭無端端又話分咗手。東東之後因為去台灣拍台劇《拜金女王》，識咗客串一場戲嘅台灣VJ魏蔓，今年26歲、33C嘅魏蔓身材火辣，曾經客串周杰倫MV。
據講佢兩個戀得火熱，魏蔓更經常自掏腰包買機票飛去北京會情郎，更曾俾人發現喺東東屋企樓下出入；不過好景不常，據知上月底佢哋吵大鑊，事緣係佢哋同朋友聚會時，魏蔓聽唔明東東同朋友傾偈，多次追問東東談話內容，搞到東東大發脾氣話：「和我交往半年，廣東話還聽不懂！」被埋怨嘅魏蔓冇癮兼委屈，自己返酒店執行李走人，之後仲經常以淚洗面，又搵朋友訴苦，繼而分手收場。
而魏蔓經理人戴安娜就話佢哋係「很好的朋友」，但未去到戀人咁話。
