曼聯前鋒奧雲縱橫球壇接近15年，先至喺剛結束嘅英超球季嘗到職業生涯以嚟首個聯賽錦標滋味；而佢最近仲好事成雙，喺月初同紅魔續約之餘，仲喺周四嘅皇家雅士谷大賽拉頭馬兼流下「第一滴淚」㖭！
帶挈曼聯隊友贏錢
奧雲一向鍾意賭，而且係啤牌高手，佢亦好熱衷賽馬，係馬主一名；喺周四皇家雅士谷大賽女士日嘅英王佐治錦標中（KingGeorgeVStakes），奧雲愛駒BrownPanther仲贏埋！麾下愛駒首次勝出大賽，奧雲喺拉頭馬時都忍唔住眼濕濕。佢話：「我喺球壇咁耐，從來未試過為比賽而喊；但今次愛駒勝出，我實在太激動喇，所以忍唔住喊咗出嚟。」
31歲嘅奧雲仲話：「喺球壇，我知道自己嘅能力，所以無論贏輸或自己有冇入波，都唔覺得有喊嘅需要；但今次見到BrownPanther勝出就唔同，因佢係我隻11歲馬女TrebleHeights嘅囝囝，我哋一家當佢哋兩母子係寵物咁看待。睇住BrownPanther勝出，嗰種感覺真係要試過先知，我仲因為不斷同佢打氣，嗌到聲沙。」
BrownPanther今次勝出，奧雲話帶挈咗唔少曼聯隊友：「我已SMS咗隊友，叫佢哋下注喺BrownPanther身上，我諗連領隊費格遜都收到風㖭！」
擬請假帶愛駒出賽
奧雲愛駒勝出後，有資格參加稍後舉行嘅德國打吡，但咁就令奧雲有啲頭痛，因德國打吡下月3日喺漢堡舉行，而曼聯季前集訓就喺下月4日展開。奧雲話：「若果參加德國打吡，我就要向球會請一日假，希望愛馬嘅費Sir通融吓啦！」
