富豪產業信託（1881）勝在高息防風力夠，呢期個市橫風橫雨，抵博。富豪產業往績息率7.5厘，PE得8倍單位數，好保守計2011年度（12月結）每基金單位派息維持番19仙，呢個息率回報已經夠晒吸引。仲要咁睇，香江旅業興旺，新春假期酒店入住率及房租已經例牌上升，喺過去無耐嘅「五一」長假，祖國訪港旅客就達到30.4萬人次，比對上年同期多咗21%，香江酒店業繼續受惠。
再講，富豪產業喺香港有超過3900個酒店客房，佔本地甲、乙級酒店過10%比重，有咁嘅數量優勢，肥過肥仔水，預測息率肯定仲吸引。呢轉吼實2.40元長期支持入市，博升三成到3.12元，富豪產業嘅息率回報，仲係高達6厘水位。
首國超賣望升兩成
首長國際（697）由上年9月高位1.46元，跌到家，累跌50%，到上個星期尾，已經有球球聲買盤護航。此無他，首國跌到現水位，連埋周線圖在內嘅14RSI，跌到得番20，認真價殘。再講，首國現價NAV折讓貼近40%，已經有唔錯嘅折讓墊底。就當超賣博反彈，首國升20%到0.86元，未有耐上到每股NAV1.17元。
錢雋