旅發局主席田北俊上個月去歐洲度假，其中一個行程係應法拉利邀請，到摩納哥蒙地卡羅睇一級方程式大賽車。由於田少係法拉利車主，因此獲安排在VIP包廂近距離觀看賽車，據講呢啲包廂票價最少2,500歐羅，即係約27,800港元，可見法拉利車主身份幾咁尊貴。
F1大賽車門券矜貴，不過田少話其他使費仲襟計，由於嗰幾日去蒙地卡羅嘅人都係想睇賽車，人人都想book最接近跑道嘅酒店，因此房租貴到飛起，佢入住間酒店三晚租金盛惠8,000歐羅，兌番港紙接近90,000蚊，呢個銀碼，喺香港月租豪宅都得。
大腕擁有三部法拉利
法拉利跑車價值不菲，車廠自然捨得大手筆招待貴客。據田少講，呢個VIP團入面有幾個內地有錢佬，正所謂人不可以貌相，雖然幾個大腕貌不驚人，但做得法拉利車主，身家都唔會少得去邊，田少有一架法拉利做腳車，與幾人閒談，其中一人輕描淡寫話有三架法拉利，田少話由此可見內地經濟有幾發達。
講開跑車經，有個北京人話想買法拉利即將出嘅新車，限量生產100架，價錢唔係問題，因為買家可獲車廠安排到全球各地10個賽車場試車，田少話咁樣玩真係好吸引，事關買架車返香港，落地後恐怕冇乜機會享受極速，所以佢估計呢架限量版法拉利一定大受歡迎。
見到內地富豪買奢侈品、大玩具如此豪氣，田少都不禁話家陣高端消費品通通眼望神州，香港市場只係點綴形式咋。
笑言香港係被邊緣化
佢同八方講，法拉利後人幾年前做埋飛機公司，生產法拉利私人飛機，據佢所知，目標顧客主要係內地頂級富豪，因為架飛機續航能力大約4小時，剛好係由北京出發到全國各地，差啲先可以飛嚟香港，即係香港富豪買嚟都冇用，因為唔可以直飛上京，由此可見，呢架飛機未必志在做香港闊佬生意，田少更笑言，香港真係被邊緣化嘞。
mailto:[email protected]