唔係人人有得去歐洲睇Fomula1，今晚就有個機會，因為紅牛車隊戰車今晚會殺入中環，喺龍和道表演街道賽車。F1戰車今晚6點幾撻引擎，主辦單位稱最少會跑三轉，好短癮，如果大家仍然想睇，大會建議下午3點好去霸位，因為觀眾席座位有限，先到先得。觀眾席設在中環大會堂對面，如果天氣唔好，黑雨警告就會取消。
香港首次有F1跑街，不過運輸署只批准時速上限130公里，呢個速度，港九「亡命Van」啲紅Van司機輕易踩到，有乜咁驚奇？雖然香港街道日日上演生死時速，不過汽車會會長雲維熹仍然希望香港可以搞街道F1賽事，又話幾年前港府曾提出喺大嶼山搞賽車場，可惜不了了之。