與不少父子兵情形近似，關係既為父子，也是上司下屬。Moiselle國際集團父子兵陳欽杰及陳柏熹，說着他們的父子故事，竟然是20年來都是開心正面，風平浪靜。陳欽杰視三個子女為事業王國接班人，教仔或培訓事業成長，他的座右銘是對兒子付出自由，讓他發揮自己的潛能。撰文：嚴祖莉
要23歲的陳柏熹（Harris）先說父親陳欽杰（Boby），他說：「細個時嘅印象係，爹哋係開心大使，帶好多正面、動力同歡樂畀我哋，到初中時，爹哋緊張我學業，開始管教嚴啲，但唔係鬧嗰種，我哋係會講人生道理、講將來，好似個啟蒙老師咁，令我會諗吓之後條路會點行，到我去咗英國留學，因為見唔到，反而仲掛住，要日日通電話，呢段時間爹哋既係爹哋，又係老師。」
「愛之家」的兩父子，彼此最難忘一刻是那時？Harris先說：「15歲時一家人坐郵輪去瑞士，我病咗，夜晚嘔到想窒息，爹哋埋嚟攬一攬我，嗰份warm家印象仲好深。」Boby的難忘片段則是：「Harris其實算好文靜，好多時情緒都係隱藏住，送佢去英國寄宿學校，可能佢真係好唔捨得，啲情緒一次爆出嚟，啲眼淚一粒一粒好似10卡鑽石咁大粒，到家我仲好記得。」
求及格VS攞滿分
兩父子少有意見分歧？Harris說：「真係好少，反枱嗌交呢啲場面冇喺我哋身上發生過，唯一係做父母當然想仔女讀書成績好，想我攞100分，但係我就諗點解要100分？60分及格都OK啦，而且呢方面我有人support，就係媽咪，佢都認為及格就算數啦，嗰時我數理科成績唔好，爹哋就安排個補習老師畀我，由我放學3點半開始，一路補，中間晚飯小休，飯後又再補過，嗰時我表面上好乖好聽話，實際就好hea，亦都試過詐病唔去學小提琴，最反叛都不過係咁。」
爸爸Boby回想這段對兒子強制式補習日子，他說：「我唔睇得咁多，就惟有搵個人返嚟睇住佢，嗰時嘅諗法當然都係希望仔女畢業後做專業人士，試吓唔同嘢先，唔得最尾嗰步返公司都未遲。」
報讀時裝惹反彈
但其實幾歲人仔已接觸父母時裝王國的Harris，已經種下貪靚愛時裝愛設計的因子，中五後第一份暑期工在公司實習，當時柴娃娃設計了12款衫，竟然賣得！到要在英國報讀大學時候，風平浪靜的陳家終於掀起丁點漣漪，反應最大竟然是一向站在兒子陣營、認同及格便可的陳媽媽。
Harris說：「A-Level之後報讀大學，6間最出名嘅學府5間都收我，科目不外乎都係經濟管理、商業管理，媽咪最唔鍾意就係時裝管理，我就偏偏報咗呢科，激到媽咪生蝦咁跳，喺英國當街當巷鬧我，自己揀呢科係第一，當然鍾意時裝，就算設計創作都唔係單一喺件衫上面，管理一個品牌形象都係創作嘅一部份。」
隨時做後盾
時間證明Harris選擇讀時裝管理這一科，學有所成加入父母公司幫手確有成績，Boby也說：「好彩當初冇逼佢讀其他科目，睇住佢發揮到天份，又有團火、有要求，家可以幫到公司，係個好大bonus。」
子女齊幫忙
Boby從來教導子女也不推行個人主義，他說：「我哋一家人、成間公司都係teamwork、teamwork先至有火花，我三個仔女，大仔負責海外市場策略，Harris負責成個brand設計同形象，細女仲讀緊大學，畢業返嚟會幫手做operation。」
總結既是寶貝仔又是下屬，Boby早有一套平衡理念策略，他說：「喺屋企好、公司好，一切都係以愛出發，我做爹哋有責任替佢鋪路，畀自由佢發揮自己嘅潛能空間，同時間其實喺後面睇住佢，有唔掂都要幫佢收復失地。」
不嚴管緋聞
陳欽杰經營生意有道，經營一個美滿家庭也接近滿分，至少父與子都這樣認為。他指一個美滿家庭對他來說的核心價值很簡單：以愛出發。子女的管教，不過份嚴苛，給予自由信任。他說：「細個時當然有定『灰姑娘歸家式』限制，家佢出嚟做嘢，又有自己嘅社交圈子，但係我哋一家嘅rule同schedule都冇變，周末一家人去教堂，然後阿仔去做gym，夜晚再聚番食晚飯，然後就係佢自由時間。」
Harris名字不時與賭王千金何超盈拉在一起，父親Boby說：「如果真係有負面新聞出咗嚟，一定唔會用責怪形式問佢，而係用傾偈方式了解番件事，自自然然出路牌就會出現。」
人物誌：父子同進取
陳欽杰（Boby），52歲，77年與太太徐巧嬌創業開設製衣廠，從事成衣批發及出口，87年將工廠北移，96年創辦慕絲（Moiselle），以土炮時裝品牌來說，十分進取，廣告女郎人選都是當紅藝人如蔡少芬及黎姿等。
02年Moiselle在港交所主板上市，市值逾5億，並屢獲殊榮，如01年獲頒香港青年工業家獎，06年獲頒世界傑出華人獎。
陳柏熹（Harris），23歲，擁有UniversityofArtsLondon的時裝管理文學士學位，09年加入Moiselle，現為該集團形象總監，主力負責設計部門，2011年開始接手公司旗下品牌mademoiselle。
