後日是一年一度的父親節，有四名子女的鍾鎮濤（阿B）近年忙於工作經常四圍飛，跟仔女相處的時間越來越少，不過他們的關係依然親密，而他的女友范姜先後誕下囡囡鍾懿和鍾幗，為了不想錯過她們成長的過程，阿B寧願犧牲搵錢和休息時間，好像日前兩女到惠州探爹哋時，阿B即使捱眼瞓也堅持陪囡囡游水，享受親子樂。
近年鍾鎮濤經常飛來飛去搵銀養家，好像最近便返內地惠州拍攝新戲《東成西就2011》，通告排得密麻麻，有時候每日可能只有幾小時瞓覺，不過今個星期日是父親節的大日子，阿B正積極向劇組申請休假回港享天倫樂。由於囡囡鍾懿和鍾幗已很久沒有見爹哋，故日前她們靜雞雞到惠州探班，給爹哋一個意外驚喜。
姊妹裝現身
當阿B見到兩女兒以姊妹裝出現眼前時，即露出開心笑容，鍾懿和鍾幗見到爹哋亦馬上黐實阿B嗲番夠本，要阿B陪她們游水。雖然阿B前一晚拍通宵，只是小睡一會稍作休息，但一聽到囡囡的請求，這位廿四孝老竇立即捱眼瞓做「伴游」，陪她們游水，享受親子樂。
阿B坦言：「其實我都係近來先開始接番一啲去外地逗留比較長嘅工作，佢哋細個時，我唔會接呢類工作，因為我唔想錯過佢哋成長嘅過程。」不過囡囡日漸長大，加上通訊發達，故此阿B才開始捨得接出埠的工作，現在若身在外地，他堅持每天都跟囡囡視像通話。
提到跟鍾懿和鍾幗的生活點滴，阿B憶述說：「鍾懿一直都要同我同范姜瞓，有一次我咳唔舒服，我叫佢唔好咁近我，佢就話：『咁你擰轉面。』我一聽到真係有啲心淡，但點知佢再講：『我幫你拍吓背脊等你舒服啲。』我真係當堂冧晒。」至於細女鍾幗，雖然她仍牙牙學語，但每次當她有食物在手，總會遞給阿B與他一同分享，令阿B甜入心。
給子女空間
至於跟前妻章小蕙所生的嘉晴和嘉浚，阿B表示兩人長大，他盡量保持聯繫之餘亦給他們足夠空間。想收到甚麼父親節禮物？阿B謂：「只要見到仔女開心，就係我最大嘅禮物。」不過鍾懿畫了一張畫送給阿B，囡囡的心意令他心滿意足。
撰文：葉雪
