利物浦每年出新波衫，全球幾乎可以賣到100萬件，僅得曼聯、巴塞隆拿同皇家馬德里可以超過呢個數目，可想而知紅軍嘅波衫幾咁受歡迎。不過，紅軍新一季出嘅第3作客球衣，滲入咗藍色元素，就引起球迷嘅熱烈討論。
相信球迷都知道，默西塞德郡嘅兩間英超球會，即利物浦同愛華頓，一向係宿敵，而紅色代表利物浦、藍色代表愛華頓已經冇人不知；但今次紅軍嘅第3作客白色波衫，卻加入藍色元素，將袖口同膊頭三間都用染藍，雖則係淺藍，只是用上呢種顏色，就不期然會同愛華頓拉上關係，所以紅軍球迷都會覺得今次波衫顏色配搭認真奇怪，冇理由跟宿敵同一陣線。
贊助商最後一季玩懷舊
紅軍嘅球衣贊助商三間牌就解釋，用上淺藍係因為利物浦創會時嘅波衫袖口都係用呢隻色，今次為咗紀念創會120周年，所以決定懷舊一吓喎。不過，有球迷發表陰謀論，話三間牌同紅軍嘅合約玩埋新一球季就完，12/13年球季，紅軍就會轉由美國運動服裝生產商《勇士體育》（WarriorSports）贊助新隊服，所以三間牌最後一季一於玩大佢，等紅軍球迷永遠都記得呢件藍色波衫。我求大俠就覺得，紅軍嘅藍色波衫用上淺藍，更加似一件馬賽球衣就真！
中場滿瀉梅利斯嗌走
至於利物浦計劃羅致查理阿當，順利嘅話應該會係今周完成交易，但係隊中有球員都預計到新一季中場人腳勁多，所以希望離隊，其中上季打得最好嘅葡萄牙國腳魯爾梅利斯就係有呢個先見之明，亦憂慮屆時如果10個中場爭位踢，情況一定唔會咁理想。
除咗魯爾梅利斯外，年紀較大嘅麥斯洛迪古斯亦擔心上陣機會越嚟越少下，亦都有意轉會，睇嚟領隊杜格利殊唔單止要增兵添實力，仲要用牙力嚟說服一班舊將留隊輪住出場賣命。