陳茵媺（Amiee）噚日喺中環為二手手袋專門店開幕擔任剪綵嘉賓，佢話向來鍾意手袋，咁大會有冇送名貴手袋作酬勞，她就話唔清楚。至於有冇人送過名貴手袋或鑽飾，Amiee話：「最貴都係獲香港小姐時嘅鑽飾。」佢強調自己唔係追求名貴物件嘅人，更加唔需要任何人送贈，佢話：「現代女性鍾意自己買，自己辛苦賺番嚟買先開心。」
「佢好多優點」
講到黃宗澤俾人影到喺屋企全裸，問Amiee會唔會叫陳豪小心啲，佢就話會叫大家都小心，仲即刻強調自己冇上過陳豪屋企。
另一邊廂，陳豪喺尖沙嘴出席手機發佈會，就大方公開話如果大會肯送多部電話，就會送畀陳茵媺，講到之前俾人目睹佢同Amiee約會，佢就話感覺好好，又大讚Amiee話：「OKo架，佢好多優點，總之感覺在心中。」佢繼續叫大家畀多啲空間佢兩個。講到黃宗澤俾人偷影單嘢，問佢會唔會小心啲，佢就話：「唔驚！我冇諗過呢樣嘢，好多時候傳媒真係逼得太緊，特別係感情方面！」
另外，陳豪最近仲做埋聖安娜餅屋代言人，日前拍廣告時，春風滿面嘅佢大發雅興，忽然喺現場彈琴奏出一曲《漣漪》，現場成班女工作人員馬上嗒糖。