《反斗車王2》要到8月才上畫，遊戲版《Cars2:TheVideoGame》已經有得玩。話說一眾車王們經過特訓成為特務，要完成任務之餘，仲要成為最快嘅賽車，利用各種道具武器各出奇謀，四人車戰比睇戲更刺激！
記者：許福合
攝影：陳盛臣
加新角色再片過
《Cars2:TheVideoGame》故事會延續電影版情節，香港要等到8月才上畫，玩遊戲就可以預先了解劇情喇！今集遊戲角色超過20個，除咗熟悉嘅閃電王麥坤等舊角色外，仲有新角FinnMcMissile及HolleyShiftwell。兩個都係英國特工，而且都係中量級車種，控制方面以FinnMcMissile比較容易，但速度則以HolleyShiftwell較優勝。遊戲模式非常多元化，除咗最基本速度賽外，仲有類以《孖寶賽車》嘅BattleAttack模式，在賽道上拿到道具，再睇準機會「陰」對手，緊張刺激；加上遊戲在單機或連線時，皆可四人對戰，另外仲有互相攻擊嘅Attack模式，都係開Party必玩之選。
儲氣開Turbo加速
車王們與地圖，都需要玩家取得成績後再Unlock開啟，不過留意要取得好成績，快並非必然，因為比賽時容許靠撞！遊戲內無維修需要，可以盡情出力去撞對手，而操作亦有特別設計，例如可以左閃右避，甚至可以雙輪行車，加上可以儲氣開Turbo加速，方便追擊對手！不過最刺激仍然係用道具，有火槍、導彈、放電油等，而賽道變化夠多，留意有秘道，適當地在秘道設陷阱，亦可以屈死對手。
其實《Cars2:TheVideoGame》仲支援3D顯示，但立體感麻麻，3D畫面光度亦不足，加上速度感不強，想玩3D畫面可能會失望。
Profile
主機：PS3、Xbox360、Wii、PC
類型：競速
遊戲人數：1-4人
發行廠商：DisneyInteractiveStudios
發售日期：6月21日
電影8月上畫
電影版嘅《反斗車王2》預計8月11日在香港上畫，故事講述閃電王麥坤要參加格蘭披治大賽搶奪實車之王寶座，不過哨牙嘜突然被當作特務，從而墮入危機之中。