史上最強1系　MforMarvelous

原以為有縮水M3美譽嘅135i，已屬1系最辣頂級，點知M系正宗傳人出現，將1系正式帶入MPower境界。由金屬橙主題色、型爆包圍、340匹癲狂馬力到六速棍仔，呢架1MCoupe個M字，已經唔止代表MotorSport咁簡單，簡直就係Marvelous！

記者：徐影龍
攝影：伍慶泉
Model：Hailey@GME

無敵車款　操控一流

■金屬橙為1M主題色，比M3更鮮艷。

要試大馬力細車，第一個諗起贏過郭富城同錢嘉樂、鍾情Megane及SciroccoR嘅吳家樂，「我都好期待成340匹嘅1M，一陣收工即刻過嚟！」唔係吹水，家樂仔喺沙田拍完劇，雖然淋完雨再曬乾，但仍不浪費時間補妝Set頭即趕過嚟將軍澳，全因畀面架1M。「嘩！個車頭好靚喎，成套包圍都好得，尤其側邊兩盞M字指揮燈。隻橙色都好靚，有啲似M3ThemeColor。內櫳不俗，軚盤用番M系藍紅線邊，其他皮位都有橙線縫邊，好靚。我貪心啲，架車咁大馬力，若換埋傳統桶椅會揸得更瀟灑。」
未講夠兩句，家樂已急不及待跳上車，實試1M真章，「雖然喺街好難試得盡，不過仍可感受到BMW嘅操控，的確比好多車廠優勝。咁細架車有成340匹馬力，但幾乎感受唔到TurboLag，抵讚！唯一問題係架車太穩，尤其頭胎用上245，尾胎更闊到265，入彎時少咗份尾轆車嘅癲狂玩法，就算熄晒TCS（循迹系統），玩「冬甩」打圈都好辛苦。其實咁都啱嘅，始終馬力太大，對非車手嚟講穩定性更為重要，想甩嘅咪換番窄啲嘅胎囉，好小問題啫！」

■淨係睇車頭一角，已靚到非筆墨所能形容。

■唔覺有TurboLag，全因寶馬雙渦流Turbo設計優越。

■毋須藍光紅圈花巧嘢，簡單一個MLogo足令人神魂顛倒。

棍波一樣咁好揸

幾年前已謠傳1系會出MCoupe，今次近距離接觸，嗰種心頭狂跳嘅興奮感覺好耐無試過。學家樂話齋，金屬橙色車身好Sharp，唔會太斯文亦唔覺兇猛得難以接近。嶄新設計頭唇，令1系車身展現出歷來最高帥氣度，比同性能嘅135iA多份跑味。
就算只可喺工業邨淺嘗一下1M，見到棍波揸法仍然令人熱血沸騰，最難得新車馬力驚人，但完全平易近人，極力子磨擦點Range相當廣闊，唔會起步、高轉下轉波時，出現猛Chok情形，比一般棍波辣跑揸得更順更利落，對棍波日漸生疏嘅港人，定必可快速上手適應。由造型、內櫳到性能，1M絕對交足功課，對比大佬M3同M5，甚至X5M、X6M，全都超過一百萬，今次1M打破「M=Million」，據聞交車已去到2012年，證明價錢吸引，大把識貨之人爭做「M群」。