正所謂「矮仔多計」，身高得1米69嘅巴塞阿根廷球星美斯喺球場上計仔多多，估唔到走出球場一樣咁蠱惑，據報喺家鄉有個私竇，仲周不時招呼啲朋友同啲肉彈模特兒，好似薩奧納（XoanaGonzalez）同克勞迪婭（ClaudiaCiardone）嚟玩，大搞酒精性愛派對。不過，佢都算識得節制，練波之前冇搞三搞四，都算有職業操守。
成日叫米列圖兄弟上嚟
23歲嘅美斯外表斯斯文文，查實內裏好open。阿根廷《自由報》日前爆料，話呢位喺10/11球季幫巴塞贏咗西甲同歐聯嘅阿根廷球星，家陣喺布宜諾斯艾利斯度假，順便備戰下月1號展開嘅美洲國家盃。而佢喺放假期間，就喺佢位於馬德羅港嘅豪華公寓內，幾乎晚晚搞淫亂派對。
《自由報》話：「美斯當正啲女仔係球場上嘅對手，要去征服佢哋，所以佢喺私竇入面舉行嘅派對，會表現得好瘋狂。而且，佢仲識得與眾同樂，成日叫埋米列圖兄弟上嚟一齊玩。而佢哋仲變態到根據足球比賽嘅規則，將啲性愛派對分為3級，分別係聯賽、盃賽同歐聯3個級別。」
訓練前拒玩算有品
聽有參加派對嘅女仔講，佢個私竇喺34樓，而且大廈保安森嚴，要經過兩個關卡先入去。據其中一個女仔話：「我喺INK夜總會同美斯搭上，到咗凌晨4點，我就跟佢同佢班朋友一齊返佢間屋。我哋傾關於跳舞嘅嘢，又打電視遊戲機，過咗一陣之後，美斯就去瞓覺，以準備第2日嘅訓練。當時私竇內有好多人，如果得我哋兩個，佢肯定會嗒咗我。」另一個女仔就話：「美斯間屋嘅環境非常幽靜，但屋入面就簡陋咗啲，有部32吋嘅電視機，有布梳化，啲窗簾就灰沉沉，感覺好低調囉。」
我求大俠唔係鼓勵人出去玩，但球星有錢又有地位，邊個唔爛玩先？美斯只要喺球場交到好成績，球迷真係話之佢搞乜嘢派對；不過，佢喺阿根廷國家隊嘅成績仲係一片空白，之前踢07年美洲國家盃同埋06及10年兩屆世盃都冇料到，如果喺阿根廷舉行嘅美洲國家盃再食白果，傳媒肯定咬住唔放。