廖碧兒甩陳豪、搭上林忠豪，形象插水下，避風頭近半月出國拍特輯。她昨日回港即遇上曾寸她貪錢、明年嫁給林忠豪堂弟的Roadshow主持梁慧恩（Viann），廖碧兒不認和林忠豪拍拖，Viann也拒認曾寸廖碧兒，兩人齊齊失憶，難怪可以大方碰頭合照。
廖碧兒昨日在尖沙嘴出席護膚品牌algologie活動，大會請來梁慧恩（Viann）做主持，Viann是廖碧兒緋聞男友林忠豪堂弟林忠澤的未婚妻，Viann和林忠澤將於明年結婚，早排廖碧兒甩陳豪、黐林忠豪時，Viann曾暗寸廖碧兒貪錢，但兩人昨日在活動上碰頭，大方孖住合照。
祝福陳豪茵媺
廖碧兒說：「喺活動上有見過面，大家都做呢行，不過私下就冇聯絡。」Viann曾寸她貪錢，她說：「唔知呢，我見到佢都會打招呼sayhi。」問她出席男友活動時，有否見過Viann，她初時說：「冇。」後來才強調自己沒有拍拖說：「冇呀，我都係勤力做嘢，我冇男友。」
近日陳豪和陳茵媺開始約會，高調談情，問廖碧兒看法，她不願多講：「我十幾日唔喺香港，唔知呀，我同佢都冇聯絡呀，我都係做番自己，如果係真，我會祝福佢。每個人都希望同身邊人有結果，我自己都一樣。」問她不認和林忠豪拍拖，可是已經分手？廖碧兒就說：「大家係朋友。」
Viann明年5月嫁
Viann則透露明年5月在君悅舉行婚禮，至於會否請未婚夫堂兄的緋聞女友廖碧兒，她說：「唔知，我同佢係工作上合作。」家庭聚會有否見過她？她說：「我冇乜參加男友家庭聚會，唔知呀。」之前寸廖碧兒貪錢，見面可會尷尬？Viann即說：「我冇講過，我只係話，我唔係唔貪，貪咗唔識使啫。」那麼，可會歡迎廖碧兒去飲？Viann即說：「朋友就冇問題囉。」廖碧兒剛被她列為工作夥伴，看來到賀機會不大。
採訪、攝影：RitaLeung