任賢齊女兒Rati三歲時踏上父親的演唱會舞台獻花，其子Cody也剛好三歲，長得靚仔可愛的他還跟爸爸一起拍健康食品廣告，珍貴的經歷正好當作三歲的紀念品。小齊帶兒子到片場開工時，他一見兒子亂跑亂跳即感後悔，笑謂拍戲時最怕與動物及小孩做對手，幸好拍攝相當順利。
任賢齊與太太Tina育有6歲女兒Rati及3歲兒子Cody，早前小齊一家四口到泰國拍廣告，順道慶祝他農曆生日。小齊今次擔任健康食品的中、港、台代言人，還與兒子Cody一同上鏡，父子兵上陣，只見Cody眼仔睩睩，表情甚多，當他扭計時，只要小齊哄他一下，他便擺出鬼馬表情，靚仔可愛。
不想囝囝做童星
小齊說：「其實我太太同我都好想趁囝囝仲細時，可以同我有一次合作機會，當係留念，第日可以睇番嘛，而且囝囝都可以了解爸爸平日係做乜嘢嘅。」但小齊謂不願意Cody做童星，這次只當作是他的三歲紀念品。
誰知到了拍攝現場，小齊便有點後悔，皆因Cody到處跑無時停，他說：「我自己拍戲都最怕動物同小孩，今次仲要係自己個仔，我又唔鬧得佢，佢喺屋企地位仲大過我o架嘛。」幸好拍攝相當順利，工作完畢，大家還為小齊慶祝生日，他笑謂能擔任產品的中、港、台代言人已是最好的生日禮物，難道父子兵酬勞奇高？小齊說：「最重要唔係錢，係健康，佢哋會送好多健康產品俾我哋食。」
復古相機作珍藏
此外，廣告商不只送產品給小齊一家享用，還送了一部復古相機給小齊，讓他在9月到新疆參加國際級的越野車大賽時，可以多拍照留念，小齊收下禮物後，不停與攝影師張文華研究攝影心得，他這個生日過得相當開心。
撰文：丁寧