余安安及廖啟智近日忙於綵排明日公演的舞台劇《遍地芳菲》，首次擔演舞台劇的余安安更捨棄高貴形象，飾演農村寡婦，她為怕影響記性，戒酒又少出街，還吃補品補腦。
余安安及廖啟智目前正為即將於香港文化中心上演10場的舞台劇《遍地芳菲》演出，兩人日前於上環文娛中心進行綵排，由於該劇以辛亥革命時期為背景，而劇中余安安飾演農村寡婦，望子成龍可惜兒子竟參加革命，令安安心力交瘁。首次演出舞台劇的余安安直言挑戰十足，她說：「因為今次嘅演出，我都推咗好多工作，因為我想全心做好，因為好難得有呢個機會，所以都覺得值得。」
考驗臨場反應
余安安表示初次綵排時自己絕對是新人，幸好目前已習慣，問到可有向智叔請教時，她說：「都會，大家都係交流吓，因為舞台劇好考你臨場反應亦唔可以NG，好講自己嘅集中力。」她表示今次演出都改變其生活作息，她說：「日常生活都有改變，家唔敢飲酒，怕影響記性，冇必要好少出街，因為身體要保持健康，唔可以畀自己病，都會食啲補品去補下腦。」
生活變得規律
智叔表示首次與余安安合作，他說：「佢一直畀我感覺好靚同高貴，今次要做呢個角色都係同佢本人好大落差，佢好畀心機去做。」智叔向來電影與舞台劇均表現得駕輕就熟，問到那樣較有滿足感時，他說：「真係各有各嘅滿足感，舞台劇一年唔可以做太多，喺角色上要慢慢享受。」另一樣令智叔享受的乃舞台劇的工作時間，他說：「因為好似返office咁，晚上可以返屋企陪家人，成個生活都會規律咗。」
採訪：王崇穎
攝影：陳慧安