要成功捉到大孖沙扑咪，除咗眼明手快，另一必殺技就係將目標逼入死角位截擊！
搞咗好耐，新創建（659）終於分拆到新礦資源（1231）上市，噚日舉行投資者推介會，新世界系大家長、新世界發展（017）主席「彤叔」鄭裕彤理所當然喺度坐鎮，點知推介會未完，彤叔突然急急腳起身離場，於是大家追晒出去睇吓咩事。
有問必答記者舒暢
原來，主人家彤叔人有三急要上廁所，為免彤叔借尿遁，在場記者就堵塞男廁門口，等彤叔解決完再截擊佢。
唔知係咪去完廁所舒暢晒，彤叔一步出男廁，都唔理身邊人反對，就同記者講「就喺呢度啦！」結果，彤叔就係咁企喺男廁門口，全程四萬咁口畀大家問問題，仲有問必答㖭，令所有行家都同樣感覺舒暢！
講番新礦資源投資者推介會，彤叔為咗隆重其事，搵咗成班大孖沙撐場，陣容包括楊受成、林建岳、「大劉」劉鑾雄、渝港國際（613）主席張松橋、恒大（3333）行政總裁夏海鈞、長實（001）副董事總經理葉德銓、金利豐（1031）老闆朱太李月華等。呢個咁星光熠熠嘅陣容，應該照得起新礦資源。
李華華
mailto:[email protected]
