林鄭一邊好打得，一邊理順，精神嚴重分裂，難怪鄉紳當她無到，一時話人肉革命，一時要全城大搜查，踢爆市區豪宅的僭建單位，實行攬住一齊死。林鄭讓步，將丁屋天台的發水玻璃屋削半，即是僭半邊冇問題，全僭就等住屋宇署來拆（不過唔知等幾耐，隨時五十年不變，長久過基本法對香港的承諾！）天台玻璃屋，相信很快會跟其他本地潮語一同登上維基百科。香港導演拍過《玻璃之城》，舉頭一望，果然是這樣！
玻璃屋造價矜貴，丁屋富戶、山頂南區和港島獨立洋房的上等人才有能力僭建。深水埗土瓜灣一帶的天台屋，都是鋅鐵搭建冬冷夏炎的簡陋籠屋，絕不浪漫，萬一失火，更會一鑊熟。僭建，凸顯貧富階級敵對。有屋才能僭出玻璃天台屋，半天吊的八十後，固然痛恨鄉紳霸地大搞地方主義特色的碉樓，也痛恨市區尊貴地段的豪宅業主，用盡疑似屋宇署長的趟窗走位掩眼法，幫自己三千呎的豪宅貪得無厭再多發水四百呎！僭建分化，「僭行者」和「僭建無門」兩批人紮行馬！直撐至終極兩腳一伸，原來市區墳地都是僭建得來，陰宅要怎樣理順？未到七月十四，已經煩死人！