今日起程去台灣拍外景嘅14位《2011香港小姐競選》候選佳麗，噚日喺將軍澳電視廣播城拜神，羅仲謙、袁偉豪、蕭正楠今次會一齊去拍攝，3號許亦妮幾乎日日俾人爆料，黃榕之前話十幾歲時同佢孖住去蒲，又有讀者提供佢同林建名個仔林孝信嘅親密照，連o靚模Iris（鍾采羲）都話佢見高拜見低踩，似乎矛頭都衝住許亦妮而來。
「同黃榕唔熟」
許亦妮對被人追住喪插嘅事通通否認，仲話：「林孝信喺英國讀書時識，好耐冇聯絡，亦冇拍過拖，黃榕只係細個時做模特兒識，同佢唔熟。」不過事實上見許亦妮親都係有錢仔，相信佢真係有啲計。13號蔡慧欣同樣都喺英國讀書但講到媾仔佢就冇許亦妮咁醒，佢話自己識嘅同學都係中等家庭，冇留意人哋係咪有錢仔。
羅仲謙噚日第一次見班佳麗，許亦妮咁多新聞佢竟然話冇留意，大家隨即笑佢可能會成為緋聞男友，羅仲謙話：「唔會囉，我唔係有錢仔。」舊年羅仲謙同港姐拍外景被指同佳麗失蹤，佢話：「吸收咗上年外景經驗，今年會發揮更好。」