小馬隊史首奪總冠軍，一向諗頭多多嘅班主古賓曾話，頒冠軍指環呢個做法太「oldschool」，仲話想搞番次頒總冠軍「手鐲」等。不過「德國槍」奴域斯基（圖）就叫古賓唔好搞咁多嘢，佢現時最想就係獲得隻冠軍指環。查實冠軍戒指係球員辛苦成季嘅成果，今次「德國槍」叫到，古賓應該唔再整古造怪，不如諗吓周四點同25萬人慶祝勝利巡遊好過啦。