60年代經典女子組合筷子姊妹花成員、鬼馬歌后仙杜拉的姨甥區宇平涉非禮三o靚模案件前日開審，事件轟動o靚模界，更越爆越多受害者，浸大咪神楊梓瑤（Carol）和周秀娜師妹吳燕安（AnnieG.）昨日自爆區宇平曾對她們施展鹹豬手，兩人分別被摸大髀和摸下體，Carol更聲稱遭區宇平軟禁三小時，其間更被游說拍裸照。
每年夏天都是o靚模推出寫真搵錢的好時機，由於o靚模市場長做長有，所以不少少女都銳意加入o靚模大軍，同時亦令到不法分子有機可乘，利用她們急於成名的心態乘機侵犯她們。出身自娛樂世家、鬼馬歌后仙杜拉的姨甥區宇平亦以開設模特兒公司之名，非禮三名o靚模，當中更有兩名o靚模被勸誘拍裸照，前日區宇平在區域法院受審，其年近70歲的母親桃麗絲亦有到庭聽審。
Carol遭軟禁三小時
由於區宇平在模特兒界打滾了10多年，事件爆出後轟動o靚模界，不少o靚模都痛斥其行為，原來受害者不只案中三名o靚模，昨日更驚爆越來越多受害o靚模，同是22歲的浸大咪神楊梓瑤和周秀娜師妹吳燕安昨日亦自爆曾遭區宇平非禮。
Carol昨日下午先在微博轉載本報有關區宇平案件的報道，並留言自爆曾目睹身材高䠷的女孩被非禮摸胸，她驚訝女孩受侮辱不反抗，並坦言有需要會出庭作證。記者昨日聯絡Carol，她直認08年曾到區宇平的模特兒公司casting，她說：「嗰時有個女職員打電話畀我，所以我不虞有詐照上去，去嗰時約晚上7點，但擾攘三個鐘先走得，嚟到佢要我熄電話唔准同外界聯絡，跟住教我點樣做model，佢見我好緊張仲將隻手放喺我大髀度，當時我反應好大即刻縮開，亦都驚到想喊。」
區宇平游說拍裸照
Carol表示區宇平一直將她軟禁在公司內，不准她離開，之後又叫了一名女孩示範做model，Carol續說：「佢叫個女仔錫佢面一啖，個女仔就自動錫咗，之後佢問個女仔可唔可以摸你個胸，個女仔話可以但我知你唔會，點知佢就即刻摸個女仔胸，個女仔好愕然，不過就冇反抗，我見到就仲驚，好想走，佢可能見我狂搣gel甲搣到甩晒，最後都畀我走，其實佢都有游說我拍裸照，話做model乜都試吓，我話冇咁嘅需要，佢仲話我唔專業㖭。」Carol強調如果有需要，她願意出庭指證區宇平，因為她覺得這些侮辱女性的行為是不可以縱容，她指當時因為只覺得他好奇怪，但未有想過報警，不過如果事件再發生的話，她一定會挺身而出報警。
AnnieG.慘被掂下體
至於另一受害者AnnieG.昨日亦自爆曾遭區宇平鹹豬手，她昨日憶述事件時猶有餘悸，AnnieG.表示事件發生於08年，當時她19歲，她說：「嗰時我簽佢一年，佢每隔一排就要我哋更新啲相接job，啲同事話網上啲人成日話佢非禮女仔，過咗一段時間我幫佢做最後一個job，上到studio時，原本應該係stylist同我整衫，但佢就忽然踎低身幫我整理條褲，嗰時我條褲好短好窄，仲喺我大髀罅度拉，其實佢係掂到我下體，我嗰時唔敢出聲，但覺得好唔舒服同唔開心。」AnnieG.又大爆區宇平不斷游說其他o靚模拍裸照，當中包括其朋友，她形容區宇平的為人猥瑣，並不時色迷迷望女仔，對於當日未有報警她坦言十分不開心，她表示其母亦有叫她要報警，但因為當時她已簽了新公司，所以就不想張揚事件，但她強調如果可以亦願意出庭作證指證區宇平。
此外，o靚模Hidy原來也曾險遭狼吻，她接受電話訪問時說：「我都有上過區宇平間公司，嗰陣我仲係兼職模特兒，上到佢公司之後，佢係咁讚我，叫我着泳衣，又叫我坐大髀，真係好多無理同離譜嘅要求，佢冇搞過我，因為我全程怒睥住，我做咁耐model都未見過啲咁嘅人，之後我咪唔畀面佢走咗。」Hidy還說：「跟住佢都有打過電話同msn搵我，但係我都冇理佢，所以啱啱入行嘅女仔真係要小心啲。」而周秀娜師妹Jeana亦有類似經驗，昨日她直認曾上區宇平的公司casting，當時他要求Jeana穿上泳裝及內衣，她有感要求無理而怒睥區宇平，並拒絕妥協，她藉此希望其他女仔不要上當。
採訪：比華利、何慧斯