有機產品嘅價錢貴過普通貨一截，當然明白要環保就唔好計較錢，不過環保等於昂貴這道理，似乎有望被汽車業所打破，喺政府提高環保車優惠下，車價都實行反通脹，既然慳咗就唔好難為自己，花多萬零蚊，將配件升級，享受高啲。
記者：趙慧敏
攝影：譚盈傑
Model：Crystal@Zmodels
細細粒更靈活
唔理係咪經常要接載家中老幼出入，不得不承認越來越多男士對七人車寵愛有加，不過平日只係一兩個人出街，揸住部七人車確係有些浪費，難怪迷你版七人車一樣有咁多捧場客。
講到迷你七人車，又點少得HondaFreed，車身只有4,215×1,695×1,715mm，相比起同門的Stepwgn確係細成個Size，外形亦帶有Jazz影子，事關兩車款都採用傾斜度極大的低車頭設計，拍攝當日攝記駕來一部Jazz，大細孖同場，確係相映成趣。雖然Freed屬迷你版，但佈局絕對拍得住Stepwgn，採用2+2+3佈局，令全車中央留有Walk-through中央通道，如果身形唔係特別大，要由駕駛座一直走到尾廂都唔係難事，難怪去年底推出後，反應不俗，不過就算受歡迎都要有多啲選擇至得。
$12,000即升級
最近代理再推出一款升級版，將原來不俗的配套再提升，只要願意使多約萬二蚊，就可以即時為全車換上真皮座椅，皮料柔軟適中，雖然唔係原裝日本進口，不過一坐就知並非平價貨。另外機頭亦換成液晶顯示屏幕音響系統！至於踩住的地毯，亦換上一套賽車格仔圖案，即時令車櫳增加唔少動感。配上原裝的HID頭燈、智能感應遙控車匙，中排獨立客艙座椅，加上最討人歡心的雙電趟門，輕輕觸及手掣，車門自動趟開，絕對啱晒懶人一族。
隨時候命
如果硬要將Freed界定其功能，我想它是針對並非經常滿載七人的年輕人市場，只是偶然肩負接送任務的七人車，事關其細車身，相信將它作為稍大碼的Jazz更加適合，不過就算偶然肩負接送，其動力性能亦應付有餘，Freed配備一副1.5公升i-VTEC環保引擎，最高可輸出118匹馬力，而且是政府認可環保車，無疑令車價都慳一截。
HondaFreed
引擎：1,496cci-VTEC
馬力：118ps/6,600rpm
扭力：14.7kg-m/4,800rpm
傳動：無段變速自動波
售價：$226,724（UpgradedPackage$12,576）