繼蔡楓華月前重新振作舉行個唱後，當年同被喻為「四大癲王」的洪朝豐，士別12年亦將出山開咪，加盟鄭經翰（鄭大班）的數碼電台。對於大班的賞讚和給予機會，洪朝豐尤為感激，他希望借自己今次出山為精神病患者爭返啖氣，並寄語一眾精神病康復者說：「天無絕人之路，唔好悲觀，千祈唔好放棄自己。」 撰文：戴彩煥
51歲的洪朝豐，曾是呼風喚雨的電台當紅DJ，更曾是人見人怕的抑鬱狂躁症病患者。12年前，洪朝豐與富商劉鑾雄前妻寶詠琴拍拖後辭去新城高薪厚職的DJ工作後，因為與寶小姐分手反目而鬧得滿城風雨，洪朝豐瘋癲言行令他跟蔡楓華、藍潔瑛和陳寶蓮被封「四大癲王」。由於多年來洪朝豐曾試過兩度病發，嚇得香港幾間電台不敢貿然給予他翻身機會，讓他重投一生至愛的DJ工作。
直至近日，洪朝豐終獲鄭經翰垂青，力邀他加盟大班新成立的香港數碼電台，主持晚間訴心聲節目，最快今年8月可以開咪。
「病後冇人畀機會我」
日前洪朝豐接受本報專訪，久沒露面的他看來心廣體胖，言談有紋有路，明顯患上抑鬱狂躁症的他已康復過來。對於大班力邀加盟一事，洪朝豐坦言感激，他說：「由抑鬱狂躁症到家，係冇人願意畀個機會我，所以大班畀機會我，我好感激佢。大班3個月前搵我，我話我入過精神病房，點解你仲會搵我做節目？佢就話：『我知你有才華，同埋社會需要幫助弱勢社群。』我同佢講啲人話我癲，你請我做節目，唔怕俾人話你癲？大班就話：『係呀！我係癲，咁點吖！』」
談到病情，洪朝豐揚言自己已經康復，只要他肯繼續定時服藥及每隔三個月到醫院檢查，病便不會發作。
回想過去10多年來經歷，洪朝豐自問十分戲劇性，在很多人眼中他是「跌低咗」，今次出山開咪，深信可以令一直關心他的家人朋友放心安心。可希望作為精神病患者的借鏡？洪朝豐說：「我唔敢講，但覺得至少可以幫嗰啲精神病人爭返一口氣。我哋精神病患者係好容易被社會歧視同埋恥笑，覺得佢哋冇用、一世完蛋、唔會再企起身、生人勿近。家我做大班份工，至少可以講畀大家聽，洪朝豐曾經係個抑鬱狂躁病人，但我可以企返起身，你哋唔需要因為我過往嘅病歧視我、驚我。希望其他精神病患者唔好灰心，天無絕人之路，唔好悲觀，千祈唔好放棄自己。」
唔驚被問寶詠琴恩怨
可擔心將來被聽眾追問當年跟寶詠琴恩怨？洪朝豐笑說：「我唔驚，但介意講！都已經係12年前嘅事，仲有乜好講。」
有人將他與陳振聰相提並論，洪朝豐笑言：「對佢嘅事我冇感覺，佢嘅事唔關我事。」洪朝豐又謂不認識蔡楓華和藍潔瑛，由於「把口生喺人哋度」，對被相提並論，不由得他是否介意。不過，洪朝豐表示若將來有機會跟蔡楓華和藍潔瑛碰面，自己也會跟他們說句：「唔好放棄自己。」
