鄭秀文同許志安早幾日去日本旅行預支蜜月，佢哋喺東京街頭拖手逛街鬼咁癡纏，有傳安仔趁機求婚。前晚佢哋返香港，有幾個粉絲接機外，仲吸引近30名記者去影相，可惜佢哋刻意分開出閘。前晚約10點42分，Sammi率先推住行李車出現，被問到安仔有冇送戒指求婚，係咪訂咗婚等問題，佢都答：「冇呀冇呀。」問佢旅行係咪好開心？佢話：「OK，多謝，bye。」叫佢企定影相，但佢忽然左手插袋，唔通戴咗求婚戒指？Sammi聽見戒指兩字即抽番隻手出嚟，露出成手戒指，其中左手無名指隻卡地亞戒指最似婚戒，但佢話：「都話冇咯。」
安仔尷尬
因乜事撇低男友自己行先？Sammi話：「我攞完行李先呀，我住香港，佢住九龍。」今次旅行係咪重拾初戀感覺？佢甜笑唔出聲。究竟安仔做咗乜冧佢呢？佢話：「唔好諗得咁誇張啦。」講完就忽然狂奔，原來Sammi出閘後三分鐘，安仔就出嚟，Sammi要避開同男友同場。論表現，安仔冇Sammi咁大方，問佢有冇求婚，佢個樣勁尷尬，問佢有冇重拾初戀感覺？安仔做出個噴飯樣，有記者忍唔住叫佢開唔開心都答一句，安仔先細細聲話：「開心。」幾十歲人使唔使咁怕羞呀！
