夏日炎炎正好眠？No，Donut新成員Alina話帶大家去天水圍BBQ，「七月我有本《SummerLovers》寫真集趕書展前出，造型玩木屬性，呢度周圍園林靚景，同我襯到爆。」除咗大路BBQ食物，呢度仲可以即摘農作物買返屋企，玩埋連「海馬公園」都無嘅水上滾筒，Aline即變一仆一碌小倉鼠，又幾可愛喎！
記者：朱崇德
攝影：陳盛臣
Model：Alina
激鬥篇
水上滾筒一仆一碌
問90後一輩，相信無乜邊個知荔園為何物，嗰種本土主題樂園舊情懷真係無得彈，雖然明知當年嘅所謂機動遊戲流流哋，但感覺真係好Raw，呢種窩心感覺，估唔到會喺「綠田園燒烤樂園」再遇到。天水圍西鐵站落車，打的唔使三十大元，已經可以殺入天水圍呢片隱藏級樂土，Alina二話不說，馬上跳入全園最熱玩嘅水上大滾筒，「我喺外國旅遊雜誌就見得多，估唔到香港都有得玩。」貫徹土炮主題公園傳統，10分鐘$30平玩，玩得特別開心。
一入筒，Alina即時跌個一仆一碌，你問我，唔……我會話有種倉鼠跌落滾筒嘅感覺，「睇片，見人哋玩得好開心咁周圍碌，估唔到真係有難度。」玩落先知，原來要訣係一個慢字，行兩步，停一停，滾筒逐漸加速，人亦可以逐漸加速：「呢個水上滾筒最多三人玩，下次我會叫埋Donut成員Elka同Ice一齊玩，佢哋兩個喺寫真集玩水屬性造型，佢哋一定會玩得好開心。」一家大細撐場，驚小朋友玩有危險？Fine，樂園仲有款手攪艇仔，一樣平玩15分鐘$30，外形有啲似蒸汽輪機縮細版，以蹼輪推動，玩得安心又放心好多。
Hea食篇
燒烤包全Homemade
燒烤場，毗鄰湖畔，怕熱的話可以去有蓋場，如果想享受大自然，都係揀露天場地自在啲，全場最高流量可容納五百人，唔怕嚟到無位燒。食物方面，提供套裝形式燒烤包，用最基本黑椒、薑、蒜等調味，無錯係大路嘢，但勝在全Homemade保證新鮮，基本分為4人份$380、8人份$580，如果唔太大食，四人小家庭應該幾夠食，但如果全部後生仔5至6人，8人套餐走唔甩。就相中所見嘅4人燒烤餐，基本有齊牛扒、豬扒、金沙骨、雞全翼、牛丸、魚蛋及紅腸等，款式都叫幾多，跟餐有汽水同礦泉水，算跟得幾足。
有機作物即買即燒
叫得綠田園，農村感覺絕對唔少得！現時最當造嘅冬瓜、茄子同青提子等等農作物，全部可以即場買入當燒烤食料，當中最熱搶手貨係當造茄子，每斤$15同街市價格差無幾，勝在全有機耕種純天然，仲要係即叫即摘一定新鮮好多。如果想買返屋企做手信，冬瓜係唔錯選擇，每斤$5，大大個好壯身吓，買畀阿媽煲湯最一流！
不過大家唔好見嘢就摘，因為有啲蔬果係不作售賣用途，例如香港少見嘅仙人掌，其實佢係專用作中醫藥用途，胡亂採摘罰款$500，大家應該熱愛大自然，千祈唔好手多多呀。
魚塘餵魚踩單車
想Hea住玩，樂園亦有湖光山色加園林美景，樂園前身由上十萬呎魚塘改建而成，魚塘改建成錦鯉魚池，俾你餵餵魚、踩踩水上單車之餘（兩位20分鐘$40），湖堤邊仲種咗好多高樹，雖然呢幾日太陽都好猛烈，但感覺都陣陣清凉，隔籬就係香港濕地公園，嗰邊得個睇字，無得落水玩，呢度可以泛舟湖上，又幾過癮！
MoveYourBody勁片三輪車
Alina到此，仲首次感受到落Track風味，而且仲要係大膽車：「斜躺車？係乜嚟o架？無軚盤點揸？」簡單講，呢架偉大祖國製三輪車以前輪腳踏帶動，兩手穩定車身，再以身體左右擺動，令前輪相應左右擺動入彎，即係話，要用全身力量控制呢架車。老實，索價15分鐘$30，頭一半時間唔使旨意扮高手，慢慢熟習操控先講嘢啦，「入彎真係有難度，頭轆可擺角度非常有限，入大彎位秘訣一定要減速，不過架車簡單到連Break都無，所以要用腳踏控制。」我都有試落Track，跑道以車胎圍邊好有風味，90°及360°髮夾彎各兩大個，咪以為Easy呀，炒車經常有嗰隻。
想再激烈啲？可以試埋甩尾車，呢款三輪車完全無彎轉，揸住佢，簡直有去鹽湖城駕火箭飛車嘅感覺，直線踩到佢行一行，再拉車上Handbreak，佢就會180°甩尾大迴旋，都幾有氣勢o架，現實真車你玩唔到，呢度玩得起有餘囉。
甩尾車
天水圍拓海教路：「想甩尾勁，最緊要車夠快。」
綠田園燒烤樂園（24726848）
地址：元朗天水圍沙江圍側
交通：天水圍西鐵站轉的士約$30