伯明翰來季將要在英冠角逐，班主楊家誠失望之餘，亦密謀重整軍營，希望盡快重返英超。不過，身為領隊的麥利殊並唔想同楊生共度時艱，提出請辭之餘，仲想跳船到同市宿敵維拉，難怪據英國《太陽報》報道，楊生不排除訟諸法律，唔畀「反骨仔」輕易離開。
馮奇：對麥帥離隊感意外
從贏取英聯盃，到最後護級失敗降落英冠，伯明翰可謂起跌甚大，而搞到家連領隊麥利殊都想走，證明隊中真係有人唔想搭隻「沉船」。不過，麥利殊喺呢個時間話走，仲要只係寄封辭職email畀主席彭彼得就算，已經冇咩「雷氣」；而最大問題係佢要投向中部同市宿敵嘅維拉，對於楊家誠嚟講，真係咩面子都冇晒，所以就算要用到法律行動，都要阻「反骨仔」過檔。
據彭彼得講，自從伯明翰降班後，球會都一直全力支持麥利殊，除咗已經根據麥利殊落嘅「柯打」，羅致咗3名新球員外，彭彼得亦特登飛去荷蘭，傾緊麥利殊希望收購嘅燕豪芬前鋒高化文斯；夾埋「反骨仔」由上任以來，動用咗4,000萬鎊（約5億港元）組軍，又同佢續約，到護級失敗又唔即時炒佢，楊生可謂對佢仁至義盡。如今一個屈尾十想跳船過維拉，點計都係麥利殊理虧。
至於財務總監馮嘉奇都對於麥利殊提出離隊嘅決定感到意外，因為球會方面基本上已經同麥利殊留隊有共識。「馮奇」估計可能因為隊中部份主力球員，好似史葛丹恩、施巴斯坦拿臣等會相繼離隊關係，麥利殊先至想唔教。
除咗可能訟諸法律行動外，亦有傳伯明翰正緊急物色人選頂替麥利殊，其中樸茨茅夫領隊葛迪利爾係其中之一。
列治維忽然悔婚
另外，伯明翰後衞列治維（圖右）亦有唔多好嘅消息傳出，皆因呢位曾經效力過維拉嘅守衞，正準備舉行佢個價值17萬鎊婚禮嘅前8日，突然向獲邀請嘉賓發短訊話臨時取消，情況同艾舒利楊格一模一樣，莫非呢輪興玩「悔婚」？
